Keniyadagi yirik GESda sodir bo‘lgan avariya tufayli ko‘plab hududlar elektr ta’minotisiz qoldi

Keniyadagi yirik GESda sodir bo‘lgan avariyadan keyin mamlakatning ko‘plab hududlari elektr ta’minotisiz qoldi. Bu haqda Keniyaning The Star nashri xabar bermoqda.

“Umummilliy elektr ta’minotidagi uzilish Turkvell GESidagi uskunaning ishdan chiqishi natijasida yuz berdi. Maxsus guruhlar nosozlikni bartaraf etish ustida ishlamoqda. Kun oxirigacha mamlakatning katta qismida elektr taʼminoti tiklanishini kutyapmiz”, — dedi Kenya Power boshqaruvi raisi Joy Mdivo-Masinde.

Avariya oqibatida shaharlar va ko‘plab strategik muhim infratuzilma obyektlari elektr ta’minotisiz qoldi. Nayrobi xalqaro aeroportida ham elektr ta’minoti yo‘qligi sababli reyslar bekor qilindi. Hukumat binolari, jumladan, Keniya prezidenti ma’muriyati idorasi ham elektr energiyasisiz qolgan.