Alabama shtati Bosh prokuraturasi AQSH Oliy sudidan 58 yoshli mahbus Kennet Yudjin Smitni qatl qilish sanasini belgilashni so‘radi. Ular mahbusni yangi usulda — azot yordamida qatl qilishni rejalashtirmoqda, deb xabar berdi Associated Press.
Havo tarkibining 78 foizini tashkil qiladigan azot kislorod bilan birga nafas olganda odamlar uchun zararsiz. Ammo sof azotdan nafas olayotganda odamda gipoksiya paydo bo‘ladi, bu esa o‘limga olib keladi. Qatlning yangi usuli tarafdorlari jarayon og‘riqsiz bo‘lishini taxmin qilmoqda, deb ta’kidladi AP, qarshi taraf esa buni inson ustida tajriba o‘tkazishga qiyoslamoqda.
Alabama shtatida qatlning yangi usuliga 2018-yilda ruxsat berilgan, bunga mahbuslarni o‘ldiradigan inyeksiya uchun dori yetishmasligi sabab bo‘lgan, ammo yangi usul hali qo‘llanmagan. Oklaxoma va Missisipi shtatlarida ham o‘lim jazosi sifatida azot gipoksiyasiga ruxsat berilgan.
Yangi usulni amalga oshirish tashabbusi allaqachon huquq himoyachilarining tanqidiga uchradi. Advokatlar guruhi vakilining aytishicha, shtat “umuman isbotlanmagan va foydalanilmagan usul bilan tajriba o‘tkazishga haqli emas”.
AQSHda mahbuslar qanday qatl etiladi?
AQSHda o‘lim jazosiga ruxsat berilgan shtatlarda maxsus inyeksiya qo‘llanadi. Ammo ko‘p hollarda farmatsevtika kompaniyalari hukumatga dori berishdan bosh tortadi. 2020-yilda AQSH Adliya vazirligi qatl qilish usullarini kengaytirib, otib o‘ldirish, gaz kamerasi va elektr stul yordamida jazoni ijro etishga ruxsat berdi.
Izoh (0)