25-avgust oqshomida AQSHning Oklaxoma shtatida o‘tkazilgan maktab o‘quvchilari o‘rtasidagi futbol matchida otishma sodir etildi. Oqibatda kamida to‘rt kishi yaralandi.
Otishma Oklaxoma Siti yaqinidagi Chokto shahrida “Del Siti Igliz” va “Chokto Yelloujekets” jamoalari o‘rtasidagi o‘yinning uchinchi choragida sodir bo‘ldi, deb xabar berdi News9 politsiyaga tayanib. Otishma lahzasi kadrlarga tushgan.
Yaralanganlar orasida oyog‘idan o‘q yegan 15 yoshli qiz ham bor. Yana bir o‘smir (yoshi ko‘rsatilmagan) Oklaxoma-Sitidagi kasalxonaga vertolyotda yetkazilgan. Jabrlanganlarning ahvoli hozircha noma’lum. Bir yaradorga stadionda tibbiy yordam ko‘rsatilib, keyin uyiga yuborilgan.
Fox25 telekanaliga ko‘ra, gumonlanuvchi hozircha qo‘lga olinmagan. Chokto politsiyasining ma’lum qilishicha, otishmada kulrang sviter kiygan afro-amerikalik gumon qilinmoqda. Gumonlanuvchi avtomashinada voqea joyidan qochib ketgan.
Politsiya ma’lumotlariga ko‘ra, otishmada Del-Siti shahrining xizmatdan tashqaridagi politsiya xodimi ishtirok etgan bo‘lishi mumkin. Politsiya boshlig‘i Loyd Berger ofitser biror kimga qarata o‘q uzganini tasdiqlay olmadi, biroq u qurol ishlatganini tasdiqladi.
Maktab atrofi va futbol maydoniga yaqin joyda bir necha yo‘l-transport hodisalari qayd etilgan.
Izoh (0)