AQSH rasmiylari Rossiyaga muntazam dronlar hujumini Ukrainaning sekin borayotgan qarshi hujumi fonida Kiyev hamon javob qaytarish qobiliyatiga ega ekanini xalqqa namoyish etmoqchiligi bilan bog‘ladi. Bu haqda The New York Times xabar berdi.
NYT suhbatdoshlarining fikricha, agar bunday taktika strategik maqsadni ham ko‘zlasa, bu ukrainalik aholi va qo‘shinlar ruhini ko‘taradi. Nashr Ukraina Bosh razvedka boshqarmasi vakili Andrey Yusovning so‘zlariga ishora qilib, Kiyev Moskvaga dronlar hujumi davom etishini bildirgan bo‘lsa-da, hujum uchun javobgarlikni bevosita o‘z zimmasiga olmayotganini yozdi.
Iyun oyida Kiyev qarshi hujumga o‘tdi, biroq Ukraina qo‘shinlari Rossiya mudofaasini yorib o‘tishga qiynalmoqda, texnika va qo‘shinlarda katta yo‘qotishlarga duch kelmoqda. Jang maydonida biroz muvaffaqiyatga erishgan Ukraina dron hujumlarini kuchaytirdi, deb ta’kidlaydi NYT. Gazeta yozishicha, Ukraina o‘z hududida ishlab chiqarilgan dronlardan foydalanyapti.
AQSH Rossiya hududiga uchuvchisiz uchoqlar hujumiga bir necha bor e’tiroz bildirgan. Iyul oyidagi birifingda Oq uy matbuot kotibi Karin Jan-Pyer Vashington “Rossiya ichidagi hujumlarni qo‘llab-quvvatlamasligimizni aniq qilib bildirgan” degandi.
Moskvaga dronlar hujumi
So‘nggi bir necha hafta ichida Moskva va Moskva viloyati muntazam ravishda uchuvchisiz uchoqlar hujumiga uchradi. Xususan, 21—22-avgust kunlari Moskva viloyatida dronlar urib tushirildi, 18-avgustda esa Moskva shahri yaqinidagi noturar joy binosiga uchuvchisiz uchoq quladi.
23-avgustga o‘tar kechasi hujumchi dron “Moskva Siti”gacha keldi va hududdagi qurilishi bitmagan binoga urildi.
26-avgust kuni tongda Rossiya Mudofaa vazirligi “Ukraina harbiylari samolyot tipidagi dron yordamida” Moskva va Moskva viloyatidagi nishonlarga zarba berishga uringanini ma’lum qildi.
Izoh (0)