AQSh bosh prokurori Merrik Garland o‘lim jazosiga vaqtinchalik moratoriy joriy etish (taqiqlash) to‘g‘risida memorandum chiqardi. Bu haqda Adliya vazirligi matbuot xizmatiga tayanib, “RBK” xabar berdi.
“Biz nafaqat AQSh Konstitutsiyasi va qonunlari bilan kafolatlangan huquqlar jinoiy sud ishtirokchilarining barchasi tomonidan hurmat qilinishini, balki adolatli va insonparvar munosabatni ta’minlashimiz kerak. Ushbu majburiyat, ayniqsa, o‘lim jazosi tayinlangan jinoyatlar uchun amal qiladi”, — dedi Garland.
Adliya vazirligining ta’kidlashicha, so‘nggi ikki yil ichida protseduraga ba’zi o‘zgarishlar kiritildi va 17 yil ichida federal darajadagi birinchi qatllar o‘limga olib keluvchi inyeksiya shaklida amalga oshirildi. Biroq endi ushbu usulning insonparvarlik darajasini baholash, shuningdek, federal jinoyatchilarni qatl qilishga imkon beradigan tuzatishlarni batafsil ko‘rib chiqish talab etiladi.
Buning uchun vazirlik federal idoralar, davlat hokimiyati organlari va tibbiyot mutaxassislari bilan bir qator konsultatsiyalar o‘tkazmoqchi. Tekshiruvlar va maslahatlashuvlar qancha davom etishi va o‘lim jazosiga moratoriy qachongacha amal qilishi haqida xabar berilmagan.
2003-yildan 2020-yilgacha AQShda federal darajadagi o‘lim jazosi amalga oshirilmagan. Shu bilan birga, shtatlar hukumatlari, uni mustaqil ravishda tayinlashi va o‘tkazishi mumkin bo‘lgan. Amerikaning 23 shtatida o‘lim jazosi taqiqlangan.
2019-yilda Adliya vazirligi federal qamoqxonalarda o‘lim jazosini ijro etishga ruxsat berdi. O‘sha paytdagi bosh prokuror Uilyam Barr AQSh Jazoni ijro etish federal boshqarmasi boshlig‘i Xyu Gurvitsga bolalar va qariyalarni o‘ldirishda aybdor deb topilgan besh nafar eng shafqatsiz jinoyatchini qatl etishni buyurdi.
Moratoriy bekor qilinganidan beri birinchi federal darajadagi qatl 2020-yil sentabr oyida Indiana shtatida amalga oshirildi: o‘shanda jinoyatchi Kristofer Valvaga o‘limga olib keluvchi inyeksiya qilindi, u 1999-yilda 19 yosh payti nasroniylik faollari bo‘lgan juftlikni o‘ldirgani uchun jazolandi.
2020-yilning noyabrida Yevropa Ittifoqi AQShda o‘lim jazosi qo‘llanilishidan xavotir bildirgan edi. “Yevropa Ittifoqi har qanday vaqtda va har qanday holatda ham o‘lim jazosiga qat’iy qarshi ekanini eslatib o‘tadi va AQSh ma’muriyatini ushbu qarorni qayta ko‘rib chiqishga va uni federal darajada to‘xtatishga chaqiradi”, — deyilgandi Bryussel bayonotida.
Biroq shundan keyin Adliya vazirligi jinoyatchilarni o‘ldirish usullari ro‘yxatini kengaytirib, ularga otib o‘ldirish, gazli kamera va elektr stulni qo‘shdi. Vashingtonda farmatsevtika kompaniyalari qamoqxonalarga o‘limga olib keluvchi inyeksiya uchun zarur bo‘lgan dori-darmonlarni yetkazib bermaydi, shuning uchun hukumat muqobil usullarni taqdim etishga qaror qilgan.
Izoh (0)