Faoliyati Ukraina Bosh razvedka boshqarmasi (GUR) tomonidan muvofiqlashtirilgan maxfiy guruhlar ikki aerodromda Rossiyaning bombardimonchi samolyotlarini uchuvchisiz dronlar bilan urdi, deb xabar bermoqda “UNIAN”.
NV nashrining GURdagi manbaga tayanib, yozishicha, so‘nggi bir necha kun ichida diversantlar guruhlari Rossiyaning beshta samolyotini, jumladan, Ukraina shaharlariga raketa hujumlarini uyushtirgan strategik bombardimonchi samolyotlarni zararsizlantirgan.
Manbaga ko‘ra, 19-avgust kuni ertalab Ukraina harbiy razvedkasi bilan hamkorlik qiluvchi agentlar Rossiyaning Novgorod viloyati Soltsi shahridagi harbiy aerodromga dronlar yordamida hujum qilgan. Tu-22 M3 bombardimonchi samolyoti yo‘q qilingan, yana ikkita samolyotga zarar yetgan.
21-avgust kuni esa Rossiyaning Kaluga viloyatidagi Shaykovka aerodromida dron hujumi oqibatida yana ikki rus bombardimonchi samolyotiga zarar yetkazilgan.
“Ushbu dronli operatsiyalar GUR tomonidan muvofiqlashtirilib, harbiy aviatsiyada dushmanga katta talafotlar keltirdi. Asosiysi, bunday samolyotlar (Gap Tu-22 M3 haqida gap ketmoqda) agressor mamlakatda hozir ishlab chiqarilmaydi”, — deya qo‘shimcha qildi GURdagi manba.
Rossiya aerodromlariga hujumlar
21-avgust kuni Rossiyaning Telegram kanallari Ukrainaning uchuvchisiz uchar apparati Kaluga harbiy aerodromiga hujum qilgani haqida xabar berdi.
Ularga ko‘ra, soat 08:00 atrofida Shaykovka hududiga qo‘lbola portlovchi moslama o‘rnatilgan fuqarolik droni qulagan, u go‘yoki “o‘z vaqtida urib tushirilgan”. Shundan so‘ng voqea joyida yong‘in boshlangan.
Ukrainalik faol Sergey Sternenkoga ko‘ra, hujum paytida Rossiyaning Tu-22M3 bombardimonchi samolyoti shikastlangan bo‘lishi mumkin.
19-avgust kuni Novgorod viloyatidagi Tu-22M3 bombardimonchi samolyotlari joylashgan Soltsi harbiy aerodromiga dron hujumi uyushtirilgani maʼlum bo‘ldi. Rossiya Mudofaa vazirligi yong‘inda bitta samolyot zarar ko‘rganini xabar qildi.
Shu bilan birga, ekspertlarning fikriga ko‘ra, Rossiya yo‘qotishlarni kamaytirib ko‘rsatadi, shuning uchun shikastlangan samolyotlar ko‘proq bo‘lishi mumkin. Guvohlarning so‘zlariga ko‘ra, kamida ikkita samolyotga zarar yetgan.
Izoh (0)