Rossiyaning Oyga uchirilgan “Luna-25” avtomatik sayyoralararo stansiyasi qo‘nish vaqtida dvigateli o‘z vaqtida o‘chmagani uchun halokatga uchradi. Bu haqda “Roskosmos” bosh direktori Yuriy Borisov “Rossiya 24” telekanaliga bergan intervyusida maʼlum qildi, deb yozmoqda Meduza.
“To‘g‘rilash amaliyotidan oldin apparat o‘z yo‘nalishini o‘zgartirdi va 14:10 da (19-avgust) dvigatellar ishga tushdi, ular qo‘nish oldidan apparatni orbitaga to‘g‘rilashi kerak edi. Afsuski, dvigatelning o‘chishi siklogramma bo‘yicha ketmadi”, — dedi Borisov.
Uning so‘zlariga ko‘ra, rejalashtirilgan 84 soniya o‘rniga dvigatel 127 soniya ishlagan, shundan so‘ng qurilma “ochiq Oy orbitasiga o‘tib” Yerning tabiiy yo‘ldoshi yuzasiga qulagan. Dvigatelning belgilangan vaqtda ishlamay qolishi sabablari maxsus komissiya tomonidan o‘rganilmoqda.
“Luna-25” missiyasining muvaffaqiyatsizligiga yana bir sabab, Borisovning fikricha, Sovet davrida boshlangan “Luna-24” missiyasidan keyin deyarli 50 yil tanaffus qilingani.
“Roskosmos” rahbari Rossiya “hech qanday sharoitda Oy dasturini to‘xtatmasligi kerak” deb hisoblamoqda. Unga ko‘ra, Rossiyaning “Oy poygasi”dagi ishtiroki nafaqat mamlakat obro‘si yoki ba’zi geosiyosiy maqsadlarga erishishga, balki mudofaa qobiliyatini ta’minlash va texnologik suverenitetga chiqishga yordam beradi.
“Luna-25” missiyasining asosiy maqsadi — Oyning janubiy qutbiga yumshoq qo‘nish va tadqiqot — muvaffaqiyatsiz yakunlangan bo‘lsa-da, Rossiya Oyga uchish, kosmik kemani Oy atrofidagi aylana orbitaga olib chiqishda bebaho tajribani qo‘lga kiritdi”, — dedi rasmiy.
“Umid qilamanki, kelajakdagi “Luna-26”, “Luna-27”, “Luna-28” missiyalari muvaffaqiyatli bo‘ladi. “Luna-26” va “Luna-27” missiyalarini yuborish orqali biz “Luna-25” missiyasida erisholmagan natijalarni albatta qo‘lga kiritamiz”.
“Roskosmos” 11-avgust kuni Amur viloyatidagi Vostochniy kosmodromidan “Luna-25” avtomatik stansiyasini uchirgandi. Bu Rossiyaning zamonaviy tarixidagi birinchi Oy missiyasi bo‘ldi. Avvalgi stansiya “Luna-24” 1976-yilda Sovet Ittifoqi tomonidan ishga tushirilgan.
21-avgust kuni qurilma Oyga qo‘nishi kutilgandi. Bu Oyning janubiy qutbidagi birinchi stansiya bo‘lishi kerak edi. Missiya davomida “Luna-25” yumshoq qo‘nish texnologiyasini ishlab chiqishi va resurslarni, shu jumladan suvni o‘rganishni boshlashi rejalashtirilgan.
19-avgust kuni “Luna-25” qo‘nish oldidan orbitaga o‘tish paytida “g‘ayritabiiy holat” yuzaga kelgani aytildi. Ertasi kuni “Roskosmos” Oy yuzasi bilan to‘qnashuv oqibatida kosmik apparat parchalanib ketganini ma’lum qildi.
Izoh (0)