Фаолияти Украина Бош разведка бошқармаси (ГУР) томонидан мувофиқлаштирилган махфий гуруҳлар икки аэродромда Россиянинг бомбардимончи самолётларини учувчисиз дронлар билан урди, деб хабар бермоқда “УНИАН”.
НВ нашрининг ГУРдаги манбага таяниб, ёзишича, сўнгги бир неча кун ичида диверсантлар гуруҳлари Россиянинг бешта самолётини, жумладан, Украина шаҳарларига ракета ҳужумларини уюштирган стратегик бомбардимончи самолётларни зарарсизлантирган.
Манбага кўра, 19 август куни эрталаб Украина ҳарбий разведкаси билан ҳамкорлик қилувчи агентлар Россиянинг Новгород вилояти Сольци шаҳридаги ҳарбий аэродромга дронлар ёрдамида ҳужум қилган. Ту-22 М3 бомбардимончи самолёти йўқ қилинган, яна иккита самолётга зарар етган.
21 август куни эса Россиянинг Калуга вилоятидаги Шайковка аэродромида дрон ҳужуми оқибатида яна икки рус бомбардимончи самолётига зарар етказилган.
“Ушбу дронли операциялар ГУР томонидан мувофиқлаштирилиб, ҳарбий авиацияда душманга катта талафотлар келтирди. Асосийси, бундай самолётлар (Гап Ту-22 М3 ҳақида гап кетмоқда) агрессор мамлакатда ҳозир ишлаб чиқарилмайди”, — дея қўшимча қилди ГУРдаги манба.
Россия аэродромларига ҳужумлар
21 август куни Россиянинг Telegram каналлари Украинанинг учувчисиз учар аппарати Калуга ҳарбий аэродромига ҳужум қилгани ҳақида хабар берди.
Уларга кўра, соат 08:00 атрофида Шайковка ҳудудига қўлбола портловчи мослама ўрнатилган фуқаролик дрони қулаган, у гўёки “ўз вақтида уриб туширилган”. Шундан сўнг воқеа жойида ёнғин бошланган.
Украиналик фаол Сергей Стерненкога кўра, ҳужум пайтида Россиянинг Ту-22М3 бомбардимончи самолёти шикастланган бўлиши мумкин.
19 август куни Новгород вилоятидаги Ту-22М3 бомбардимончи самолётлари жойлашган Сольци ҳарбий аэродромига дрон ҳужуми уюштирилгани маълум бўлди. Россия Мудофаа вазирлиги ёнғинда битта самолёт зарар кўрганини хабар қилди.
Шу билан бирга, экспертларнинг фикрига кўра, Россия йўқотишларни камайтириб кўрсатади, шунинг учун шикастланган самолётлар кўпроқ бўлиши мумкин. Гувоҳларнинг сўзларига кўра, камида иккита самолётга зарар етган.
Изоҳ (0)