21-avgust kuni ertalab Moskvaga yaqinlashayotgan “Ukraina droni elektron urish vositalari yordamida bostirildi”, deb ma’lum qildi Rossiya Mudofaa vazirligi. Dron Moskva viloyatining Ruzskiy tumaniga qulab tushgan, qurbonlar yo‘q, deb xabar bermoqda “TASS” harbiy idoraga tayanib.
Moskva aviauzelining Vnukovo va Domodedovo aeroportlarida reyslarni qabul qilish va jo‘natishga vaqtincha cheklovlar joriy etilgan. Xavfsizlik nuqtayi nazaridan soat 06:25 dan (Toshkent vaqti bilan 08:25) boshlab reyslarning bir qismi boshqa aeroportlarga yo‘naltirildi, deb xabar qildi Vnukovo matbuot xizmati.
Domodedovo matbuot xizmatining “RIA Novosti”ga ma’lum qilishicha, qo‘shimcha xavfsizlik choralarini ta’minlash maqsadida ushbu aeroportda ham soat 06:26 dan boshlab samolyotlarni qabul qilish va jo‘natish bo‘yicha vaqtincha cheklovlar joriy etilgan.
21-avgust kuni ertalab Sheremetyevo aeroporti kamida bitta reysni qabul qilmagan, Yekaterinburgdan uchayotgan samolyot Moskvaga yaqinlashganda orqaga burilib, Qozonga jo‘natilgan. Xabar qilinishicha, uchuvchi “Moskvadagi barcha aeroportlar yopilganini” aytgan.
Aeroportlar ishi soat 10:30 da to‘liq tiklandi.
So‘nggi bir necha haftada Moskva va Moskva viloyati muntazam ravishda dronlar hujumiga uchramoqda
20-avgust kuni Moskva meri va Rossiya Mudofaa vazirligi “Janub yo‘nalishi bo‘yicha Moskvaga dron hujumining oldi olingani”ni ma’lum qildi. 18-avgustga o‘tar kechasi Moskva markazidagi Ekspomarkaz hududiga havo hujumidan mudofaa tizimi tomonidan yo‘q qilingan uchuvchisiz uchoq parchalari tushdi.
Dronlar aniqlanganda, Moskva havo uzelining aeroportlari (Vnukovo, Domodedovo, Jukovskiy va Sheremetyevo), qoida tariqasida, reyslarni qabul qilish va jo‘natishni vaqtincha to‘xtatadi.
Izoh (0)