To‘rtko‘l tumanidagi 6 ta bog‘chada tajriba-sinov tariqasida “Keytering” asosida sog‘lom ovqatlantirish yo‘lga qo‘yilgan

Qoraqalpog‘iston Respublikasi To‘rtko‘l tumanida bugungi kunda 80 ta maktabgacha ta’lim muassasasi faoliyat yuritayotgan bo‘lib, ularda jami 12 ming 300 dan ziyod bola tarbiyalanmoqda.

Tumanda kichkintoylarni bog‘chaga qamrab olishga bo‘lgan talab esa hamon yuqori. Shu bois tuman hokimligi va hamkor tashkilotlar tomonidan maktabgacha ta’lim muassasalari faoliyatini yanada kengaytirishga va ularning sonini oshirishga ustuvor e’tibor qaratilmoqda.

“Yoshlik” mahalla fuqarolar yig‘ini hududidagi 15-maktabgacha ta’lim muassasasining yangi bunyod etilayotgan qo‘shimcha binosi yana 90 nafar bolajonni maktabgacha ta’limga qamrab oladi. Qurilish ishlari “Tuproqqal’a maxsus qurilish” mas’uliyati cheklangan jamiyati bunyodkorlari tomonidan jadal tarzda olib borilyapti.  

— Ayni vaqtda maktabgacha ta’lim muassasasining yangi ikki qavatli binosi bunyod etilmoqda, — deydi qurilish korxonasining bosh muhandisi Baxtiyor Yo‘ldoshev. — Bunyodkorlik jarayonida 45 nafar ishchi samarali mehnat qilayotir. — Hozirda imoratning ikkinchi qavatida g‘isht terish, birinchi qavatida esa suvoq, elektr energiya, ichimlik suvi tarmoqlarini o‘rnatish kabi ishlar bajarilmoqda. Yangi binoni mamlakatimiz mustaqilligining 32 yillik bayrami arafasida foydalanishga topshirish rejalashtirilgan.

Shuningdek, maktabgacha ta’lim tashkilotlarida sog‘lom va xavfsiz ovqatlantirishni tashkil etish va bolalar salomatligini ta’minlash bo‘yicha ham bir qator ishlar amalga oshirilmoqda.

Jumladan, Qoraqalpog‘iston Respublikasi To‘rtko‘l tumanidagi 6 ta davlat maktabgacha tashkilotlarida tajriba-sinov tariqasida “Keytering” asosida sog‘lom ovqatlantirish yo‘lga qo‘yildi.

1 million 113 ming 235 nafar tarbiyalanuvchi davlat maktabgacha ta’lim tashkilotlarida chuqurlashtirilgan tibbiy ko‘rikdan o‘tkazildi, ularga kasalliklarning oldini olish bo‘yicha tavsiyalar va yo‘llanmalar berildi.

Tibbiy-psixik-pedagogik komissiya tomonidan 3 211 nafar bola ko‘rikdan o‘tkazilib, shundan 2 681 nafariga davlat ko‘ptarmoqli ixtisoslashtirilgan maktabgacha ta’lim tashkilotlariga xulosa-yo‘llanma berildi.