Toshkent shahri O‘zbekiston poytaxti bo‘lganiga 93 yil to‘ldi. Shu munosabat bilan shahar hokimligi ayrim maʼlumotlarni ochiqladi.
1930-yilning 17-avgust kuni O‘zSSR Markaziy ijroiya qo‘mitasining 155-sonli qarori bilan O‘zbekiston poytaxti Samarqand shahridan Toshkentga ko‘chirilgan.
O‘tgan 93 yil davomida Toshkentda ko‘p o‘zgarishlar ro‘y bergan.
Xususan, poytaxt maydoni 2 barobardan ziyodga ortib, 44 ming gektarga yetgan. Salkam 1 asrlik vaqt davomida shahar aholisi 350 ming nafardan 3 million kishiga yetgan.
“Bugungi kunda Toshkent nafaqat mamlakatning ijtimoiy, iqtisodiy, siyosiy va madaniy markazi, poytaxti, balki Markaziy Osiyodagi eng yuqori surʼatlarda rivojlanib borayotgan yirik shahardir. Shu yillar davomida poytaxtimiz tinchlik shahri, do‘stlik shahri, non shahri, Islom madaniyati poytaxti degan yuksak eʼtiroflarga erishdi. 2200-yillik shonli tarixini nishonladi”, — deyiladi hokimlik axborotida.
Ayni paytda Toshkentda 212 ta yirik sanoat korxonalari, 8 150 ta qo‘shma korxonalar, 11 242 ta kichik sanoat korxonalari hamda 82 951 ta kichik biznes subyektlari faoliyat yuritmoqda.
Poytaxt sanoatining respublikadagi ulushi 54,7 foiz, xizmatlar sohasidagi ulushi esa 40,3 foizni tashkil etmoqda. Bugungacha o‘zlashtirilgan xorijiy investitsiya va kredit mablag‘lari 385,4 million dollar bo‘lib, to‘g‘ridan to‘g‘ri xorijiy investitsiya 270,5 million dollarni tashkil etmoqda.
Izoh (0)