Iqtisodiy tadqiqotlar va islohotlar markazi ekspertlari prezident Shavkat Mirziyoyevning tadbirkorlar bilan uchrashuvda so‘zlagan nutqining lingvistik kontent-tahlilini o‘tkazdi. Ekspertlar tasviriy ifodalovchi so‘zlardan foydalanib, tahlilchilar davlat rahbari nimaga ko‘proq eʼtibor qaratayotganini aniqlagan.
Qayd etilishicha, Shavkat Mirziyoyev o‘z nutqida jami 3 884 ta so‘zdan foydalangan.
Prezidentning nutqini tahlil qilish (asl tildan) tadbirkorlarning eng dolzarb muammolari soliqlar va kreditlar ekanini ko‘rsatgan. Prezident tomonidan eng ko‘p tilga olingan so‘zlar “tadbirkor”, “biznes”, “soliq”, “korxona”, “tizim”, “mahsulot”, “kredit” va “jamg‘arma” bo‘ldi.
Xususan, “tadbirkor” so‘zi 79 marta, “biznes” so‘zi 50 marta, “soliq” so‘zi 35 marta, “korxona” so‘zi 35 marta, “tizim” so‘zi 22 marta, “mahsulot” so‘zi 21 marta, “kredit” so‘zi 21 marta va “jamg‘arma” so‘zi 18 marta tilga olingan. “Bank” va u bilan bog‘liq so‘zlar 15 marta aytilgan.
Tahlil natijalariga ko‘ra, prezident nutqining 18 foiz qismi kichik biznes, 18 foiz qismi ochiq muloqot natijalari, 13 foiz qismi sodda soliq maʼmurchiligi va byurokratiyasiz qulay muhit, 13 foizi o‘rta biznes, 13 foiz qismi sifatli va raqobatbardosh mahsulot ishlab chiqarish va boshqa masalalarga qaratilgan.
Prezident Xalqaro kongress markazida o‘tkazilgan tadbirkorlar bilan ochiq muloqotida tadbirkorlik faoliyatini kengaytirish va yangi loyihalarni amalga oshirish uchun yanada qulay sharoitlar yaratish, tadbirkorlikni rivojlantirishga to‘siq bo‘layotgan muammolarni bartaraf etish bo‘yicha muhim tashabbuslarni ilgari surdi.
Izoh (0)