Toshkent shahar hokimining poytaxt mahalliy budjetini 2023-yildagi qo‘shimcha manbalarini xarajatlarga yo‘naltirish to‘g‘risidagi qarori qabul qilindi.
Xalq deputatlari Toshkent shahar kengashi deputatlari qo‘shimcha manbalardan shakllangan 361 milliard so‘mdan ortiq mablag‘larni taqsimladi. Unga ko‘ra:
- Bektemir va Yashnobod tumanlari elektr tarmoqlarida taʼmirlash ishlari uchun — 3,9 milliard so‘m;
- Davlat organlari va uning mansabdor shaxslari tomonidan tadbirkorlar/fuqarolarga yetkazilgan zararni qoplash uchun — 30 milliard so‘m;
- 1 800 nafar ehtiyojmand oilaga ipoteka krediti dastlabki badali va foiz to‘lovlarining bir qismini qoplash uchun — 70,3 milliard so‘m;
- Yunusobod tumani Pensiya jamg‘armasi bo‘limi xodimlarining ko‘rsatkichlarini maxsus elektron moslamalar orqali baholash tizimini hamda fuqarolarga qulaylik yaratish maqsadida elektron navbat tizimini joriy qilish uchun 250 million so‘m;
- Nukus shahridagi uylarning tomlarini yangilash hamda avariyaviy holatga kelib qolgan uylarni yangidan qurish uchun — 20,1 milliard so‘m;
- “Yangi O‘zbekiston” bog‘iga tutash hududda infratuzilma va kommunikatsiya tarmoqlarini yotqizish uchun — 0,5 mlrd so‘m;
- Poytaxt mahallalarida 2022-yildan o‘tgan ijtimoiy infratuzilma va boshqa obyektlarni taʼmirlash hamda qurish ishlarini yakunlash uchun — 34,8 milliard so‘m;
- Avvalgi yillardagi qurilish ishlaridan kreditor qarzdorlikni qoplash uchun — 35,7 milliard so‘m;
- Prokuratura organlari faxriylarini qo‘llab-quvvatlash jamoatchilik markazi binosini taʼmirlash uchun — 3,2 milliard so‘m;
- Poytaxtdagi 527 va 194-davlat bog‘chalarini rekonstruksiya qilish uchun — 21,5 milliard so‘m;
- Yunusoboddagi “Oqtepa” mahallasiga yangi oqova suv tarmog‘ini o‘tkazish — 6,2 milliard so‘m;
- Tumanlar hokimliklari qoshidagi “Ayollar daftari” jamg‘armalari mablag‘larini shakllantirish uchun — 40 milliard so‘m;
- Tumanlar hokimliklari qoshidagi “Yoshlar daftari” jamg‘armalari mablag‘larini shakllantirish uchun — 40 milliard so‘m;
- “Saxovat va ko‘mak” jamg‘armasi mablag‘larini shakllantirish uchun — 15 milliard so‘m.
Shuningdek, Bolalarni sog‘lomlashtirish va aholi salomatligini tiklashga ko‘maklashish jamg‘armasi mablag‘larini shakllantirish uchun 26,5 milliard so‘m va Yangihayot tumanini tashkil etish xarajatlari uchun 13,2 milliard so‘m miqdorida mablag‘ ajratiladi.
Eslatib o‘tamiz, 14-iyul kuni Toshkent shahrining mahalliy budjeti hisobidan “Paxtakor” futbol klubi hisobiga 7 milliard so‘m mablag‘ o‘tkazib berilishi haqida xabar e’lon qilingan edi. Keyinroq shahar hokimligi holatga munosabat bildirib, hokimlik klubning ta’sischisi va bosh homiysi ekanini ta’kidlagandi.
Izoh (0)