Қорақалпоғистон Республикаси Тўрткўл туманида бугунги кунда 80 та мактабгача таълим муассасаси фаолият юритаётган бўлиб, уларда жами 12 минг 300 дан зиёд бола тарбияланмоқда.
Туманда кичкинтойларни боғчага қамраб олишга бўлган талаб эса ҳамон юқори. Шу боис туман ҳокимлиги ва ҳамкор ташкилотлар томонидан мактабгача таълим муассасалари фаолиятини янада кенгайтиришга ва уларнинг сонини оширишга устувор эътибор қаратилмоқда.
“Ёшлик” маҳалла фуқаролар йиғини ҳудудидаги 15-мактабгача таълим муассасасининг янги бунёд этилаётган қўшимча биноси яна 90 нафар болажонни мактабгача таълимга қамраб олади. Қурилиш ишлари “Тупроққалъа махсус қурилиш” масъулияти чекланган жамияти бунёдкорлари томонидан жадал тарзда олиб бориляпти.
— Айни вақтда мактабгача таълим муассасасининг янги икки қаватли биноси бунёд этилмоқда, — дейди қурилиш корхонасининг бош муҳандиси Бахтиёр Йўлдошев. — Бунёдкорлик жараёнида 45 нафар ишчи самарали меҳнат қилаётир. — Ҳозирда иморатнинг иккинчи қаватида ғишт териш, биринчи қаватида эса сувоқ, электр энергия, ичимлик суви тармоқларини ўрнатиш каби ишлар бажарилмоқда. Янги бинони мамлакатимиз мустақиллигининг 32 йиллик байрами арафасида фойдаланишга топшириш режалаштирилган.
Шунингдек, мактабгача таълим ташкилотларида соғлом ва хавфсиз овқатлантиришни ташкил этиш ва болалар саломатлигини таъминлаш бўйича ҳам бир қатор ишлар амалга оширилмоқда.
Жумладан, Қорақалпоғистон Республикаси Тўрткўл туманидаги 6 та давлат мактабгача ташкилотларида тажриба-синов тариқасида “Кейтеринг” асосида соғлом овқатлантириш йўлга қўйилди.
1 миллион 113 минг 235 нафар тарбияланувчи давлат мактабгача таълим ташкилотларида чуқурлаштирилган тиббий кўрикдан ўтказилди, уларга касалликларнинг олдини олиш бўйича тавсиялар ва йўлланмалар берилди.
Тиббий-психик-педагогик комиссия томонидан 3 211 нафар бола кўрикдан ўтказилиб, шундан 2 681 нафарига давлат кўптармоқли ихтисослаштирилган мактабгача таълим ташкилотларига хулоса-йўлланма берилди.
Изоҳ (0)