Oliy ta’lim, fan va innovatsiyalar vazirligi Acharya universitetiga oliy ta’lim xizmatlarini ko‘rsatish uchun litsenziya berilmaganini ma’lum qildi.
Ijtimoiy tarmoqlarda Acharya universitetiga qabul bo‘lib o‘tayotgani haqida xabarlar tarqalmoqda. Vazirlik vakolatli organ sifatida ushbu xabarlarga munosabat bildirdi.
Qayd etilishicha, mazkur oliy ta’lim muassasasi Vazirlar Mahkamasining tegishli qarori bilan tashkil etilgan bo‘lib, hujjatda tegishli tartibda litsenziya olganidan so‘ng faoliyatini amalga oshirishi belgilangan. Hozirda Acharya universitetiga oliy ta’lim xizmatlarini ko‘rsatish uchun litsenziya berilmagan.
“Shu o‘rinda, abituriyentlar va ularning ota-onalaridan faqatgina vazirlikning ‘edu.uz’ rasmiy saytida ko‘rsatilgan davlat, nodavlat va xorijiy oliygohlar ro‘yxatidagi oliy o‘quv yurtlarini tanlashlari tavsiya etiladi”, — deyiladi munosabatda.
2022-yil oktabrda Buxoro viloyati Qorako‘l tumanida Hindistonning Acharya International University of Uzbekistan universitetini tashkil etish rejalashtirilayotgani to‘g‘risida xabar berilgandi. Bu bo‘yicha viloyat hokimligi, Axborot texnologiyalari va kommunikatsiyalarini rivojlantirish vazirligi hamda Hindistonning Acharya institutlar tarmog‘i o‘rtasida uch tomonlama hamkorlik shartnomasi imzolangan.
Iyul o‘rtalarida Oliy ta’lim, fan va innovatsiyalar vazirligi At-Termiziy nomidagi xalqaro universitetga oliy ta’lim xizmatlarini ko‘rsatish uchun litsenziya berilmaganini ma’lum qilgandi. “Ta’lim to‘g‘risida”gi qonunning 29-moddasiga asosan, nodavlat ta’lim tashkilotlari litsenziya olingan kundan e’tiboran ta’lim faoliyati bilan shug‘ullanishga haqlidir.
Izoh (0)