Олий таълим, фан ва инновациялар вазирлиги Ачаря университетига олий таълим хизматларини кўрсатиш учун лицензия берилмаганини маълум қилди.
Ижтимоий тармоқларда Ачаря университетига қабул бўлиб ўтаётгани ҳақида хабарлар тарқалмоқда. Вазирлик ваколатли орган сифатида ушбу хабарларга муносабат билдирди.
Қайд этилишича, мазкур олий таълим муассасаси Вазирлар Маҳкамасининг тегишли қарори билан ташкил этилган бўлиб, ҳужжатда тегишли тартибда лицензия олганидан сўнг фаолиятини амалга ошириши белгиланган. Ҳозирда Ачаря университетига олий таълим хизматларини кўрсатиш учун лицензия берилмаган.
“Шу ўринда, абитуриентлар ва уларнинг ота-оналаридан фақатгина вазирликнинг ‘edu.uz’ расмий сайтида кўрсатилган давлат, нодавлат ва хорижий олийгоҳлар рўйхатидаги олий ўқув юртларини танлашлари тавсия этилади”, — дейилади муносабатда.
2022 йил октябрда Бухоро вилояти Қоракўл туманида Ҳиндистоннинг Acharya International University of Uzbekistan университетини ташкил этиш режалаштирилаётгани тўғрисида хабар берилганди. Бу бўйича вилоят ҳокимлиги, Ахборот технологиялари ва коммуникацияларини ривожлантириш вазирлиги ҳамда Ҳиндистоннинг Ачаря институтлар тармоғи ўртасида уч томонлама ҳамкорлик шартномаси имзоланган.
Июль ўрталарида Олий таълим, фан ва инновациялар вазирлиги Ат-Термизий номидаги халқаро университетга олий таълим хизматларини кўрсатиш учун лицензия берилмаганини маълум қилганди. “Таълим тўғрисида”ги қонуннинг 29-моддасига асосан, нодавлат таълим ташкилотлари лицензия олинган кундан эътиборан таълим фаолияти билан шуғулланишга ҳақлидир.
Изоҳ (0)