Farg‘ona viloyatidagi Valley innovative university MCHJga nodavlat taʼlim xizmatlarini ko‘rsatish faoliyati uchun berilgan litsenziyasi bekor qilindi.
Qayd etilishicha, Farg‘ona tumanlararo iqtisodiy sudining 2023-yil 17-iyuldagi hal qiluv qarori bilan Valley innovative university masʼuliyati cheklangan jamiyatiga 2022-yil 13-dekabrda nodavlat taʼlim xizmatlarini ko‘rsatish faoliyati uchun berilgan 053546-sonli litsenziya bekor qilingan. Bo‘lib o‘tgan sud majlisi muhokamalarida oliy taʼlim tashkiloti faoliyatida aniqlangan qo‘pol qoidabuzarliklar sudga taqdim etilgan asosli hujjatlar bilan o‘z isbotini topgan.
Nodavlat taʼlim sohasida umumiy va alohida litsenziya talablari hamda shartlariga rioya etishda qator qo‘pol qoidabuzarliklarga yo‘l qo‘ygani aniqlangan. Jumladan,
- mazkur oliy taʼlim tashkilotining litsenziyada ko‘rsatilgan foydalanish uchun ajratilgan bino-inshootlari muassislarga mulk huquqi yoki ijara shartnomasi asosida tegishli ekanini tasdiqlovchi hujjatlar mavjud emas;
- Oliy taʼlim, fan va innovatsiyalar vazirligining HEMIS axborot tizimiga taʼlim oluvchilar va pedagog xodimlar to‘g‘risida to‘g‘ri va to‘liq maʼlumotlar kiritilmagan;
- vakolatli davlat organi bilan kelishilgan holda yoshlar masalalari va maʼnaviy-maʼrifiy ishlar bilan shug‘ullanadigan rektor maslahatchisi shtat birligi joriy etilmagan;
- taʼlim tashkilotining bankdagi hisob varag‘ida 150 ming dollar yoki shu miqdor ekvivalentdagi mablag‘ mavjud emas;
- 60 ta kompyuter texnikasi bilan jihozlangan elektron kutubxona va 20 ta kompyuter texnikasi, skaner va nusxa ko‘chirish apparati bilan jihozlangan axborot-resurs markazi tashkil etilmagan;
- taʼlim oluvchilar har bir fandan o‘quv adabiyotlari (darsliklar, o‘quv qo‘llanmalari) bilan taʼminlanmagani aniqlangan.
Iyul o‘rtalarida Oliy ta’lim, fan va innovatsiyalar vazirligi At-Termiziy nomidagi xalqaro universitetga oliy ta’lim xizmatlarini ko‘rsatish uchun litsenziya berilmaganini ma’lum qilgandi. “Ta’lim to‘g‘risida”gi qonunning 29-moddasiga asosan, nodavlat ta’lim tashkilotlari litsenziya olingan kundan e’tiboran ta’lim faoliyati bilan shug‘ullanishga haqlidir.
Izoh (0)