Oliy ta’lim, fan va innovatsiyalar vazirligi At-Termiziy nomidagi xalqaro universitetga oliy ta’lim xizmatlarini ko‘rsatish uchun litsenziya berilmaganini ma’lum qildi.
Qayd etilishicha, vazirlikning Telegram-botiga fuqarolar tomonidan “Surxondaryo viloyatidagi At-Termiziy universiteti tomonidan berilgan diplomlar O‘zbekistonda tan olinadimi?” kabi savollar kelib tushmoqda.
“Mazkur tashkilot nodavlat oliy ta’lim xizmatlari faoliyatini boshlash maqsadida Maxsus elektron tizim orqali Oliy ta’lim, fan va innovatsiyalar vazirligiga murojaat qilmagan va litsenziyaga ega emas”, — deyiladi xabarda.
“Ta’lim to‘g‘risida”gi qonunning 29-moddasiga asosan, nodavlat ta’lim tashkilotlari litsenziya olingan kundan e’tiboran ta’lim faoliyati bilan shug‘ullanishga haqlidir.
Abituriyentlar va ularning ota-onalaridan faqatgina vazirlikning “Edu.uz” rasmiy saytida ko‘rsatilgan davlat, nodavlat va xorijiy oliygohlar ro‘yxatidagi oliy o‘quv yurtlarini tanlashlari so‘raladi.
Mazkur universitet o‘zining Telegram kanali orqali hozirda talabalarni qabul qilmayotgani, Oliy ta’lim, fan va innovatsiyalar vazirligidan tegishli litsenziyani hali olmaganligini bildirgan.
2022-yil iyunda Surxondaryo viloyatida tegishli ruxsatnomasiz xususiy universitet tashkil etib, fuqarolardan pul undirish holati aniqlangandi. O‘shanda M.J. va S.S. ismli shaxslar o‘zaro til biriktirib, “U.A.” MCHJni tashkil etgani va Telegram’da At-Termiziy University xususiy universiteti kanalini ochib, faoliyat yuritishga tegishli ruxsatnoma olmasdan, u yerga o‘qishga qabul boshlangani haqida xabarlar bergani ma’lum bo‘lgandi.
Izoh (0)