Korrupsiyaga qarshi kurashish agentligi tomonidan nodavlat oliy ta’lim muassasalari tashkil etish faoliyatini litsenziyalash bilan bog‘liq korrupsiyaviy xavf-xatarlar tahlil qilindi.
Tahlillar davomida ushbu yo‘nalishda mas’ul tashkilotlar tomonidan belgilangan vazifalar samarali amalga oshirilmagani, normativ-huquqiy bo‘shliqlar va boshqa korrupsiyaviy xavf-xatarlarga moyil bo‘lgan holatlar mavjudligi aniqlangan.
Jumladan, 2022—2023-yillarda faoliyati litsenziyalangan 65 ta nodavlat oliy ta’lim muassasalaridan 38 tasiga litsenziya berishda 82 ta holatda turli kamchilik va qonunbuzilishi holatlariga yo‘l qo‘yilgan. Xususan, 22 ta holatda talabgorlarga davlat yong‘in nazorati va sanitariya-epidemiologiya xizmati organlarining tegishli xulosalari olinmagan.
Shuningdek, talabgorlar tomonidan elektron tizimga o‘quv reja va fan dasturlari yuklanmagan yoki to‘liq yuklanmagan.
Tahlil yakunlari bo‘yicha agentlik tomonidan nodavlat oliy ta’lim muassasalarini tashkil etish faoliyatini litsenziyalash sohasida mavjud korrupsiyaviy xavf-xatarlarni bartaraf etishga qaratilgan takliflar ishlab chiqilgan va prezident administratsiyasiga kiritilgani aytilmoqda.
Iyul o‘rtalarida Oliy ta’lim, fan va innovatsiyalar vazirligi At-Termiziy nomidagi xalqaro universitetga oliy ta’lim xizmatlarini ko‘rsatish uchun litsenziya berilmaganini ma’lum qilgandi. “Ta’lim to‘g‘risida”gi qonunning 29-moddasiga asosan, nodavlat ta’lim tashkilotlari litsenziya olingan kundan e’tiboran ta’lim faoliyati bilan shug‘ullanishga haqlidir.
Izoh (0)