Toshkent shahrida “Zo‘rTV” jurnalisti va operatori kaltaklangani, operator ayni paytda shifoxonaga yotqizilgani haqida xabar berilgandi. Ichki ishlar vazirligining ma’lum qilishicha, holat yuzasidan jinoyat ishi qo‘zg‘atilgan.
“Zo‘rTV teleradiokompaniyasi xodimlariga tan jarohati yetkazilganligi holati yuzasidan IIV Transport va turizm obyektlarida xavfsizlikni taʼminlash departamenti tomonidan Jinoyat kodeksining 277-moddasi (bezorilik) 1-qismi bilan jinoyat ishi qo‘zg‘atilib, tergov harakatlari olib borilmoqda”, — deyiladi xabarda.
“O‘zbekiston temir yo‘llari” AJ rahbariyati OAV vakillariga zo‘ravonlik ko‘rsatib, ularga qarshi kuch ishlatgan xodim — “Ko‘prikqurilish” tresti unitar korxonasi 67-ko‘prikqurilish otryadi ish boshqaruvchisi N.Eshniyazovning ishini keskin qoralagandi.
Mazkur holat yuzasidan zudlik bilan ishchi guruh tuzilib, shu kunning o‘zida N.Eshniyazov Mehnat kodeksining tegishli bandlariga asosan ishdan bo‘shatildi. O‘z navbatida AOKA mazkur holat yuzasidan Bosh prokuratura va Ichki ishlar vazirligiga murojaat yo‘lladi.
“Daryo” bilan suhbatda bo‘lgan kanal jurnalisti voqea paytida telekanal kamerasi va operatorning burni singanini maʼlum qilgandi.
“Operatorimiz Sardorbek Yo‘ldoshevning burnini sindirishdi. Ayni paytda operatorimiz tez yordamda shifoxonaga olib ketilgan. Menda ham jarohatlar bor. Shifokorlar tibbiy ko‘rik zarur dedi. Ammo telekanal kamerasi, mikrofonini ishxonaga yetkazishim kerak edi. Shu sabab men barcha ish qurollarini olib ishxonaga qaytdim”, — degandi u.
Zo‘rTV jurnalisti Nurzodbek Vohidovning qo‘shimcha qilishicha, voqeadan so‘ng hudud profilaktika inspektori ularga qo‘ng‘iroq qilib, voqea haqida so‘ragan.
Eslatib o‘tamiz, 2022-yil 11-iyun kuni Toshkentdagi “Paxtakor” stadionida U-23 Osiyo kubogining chorak finali doirasida O‘zbekiston termasi Iroq milliy jamoasiga qarshi o‘yin o‘tkazgandi. O‘yinini yoritishga borgan “Sevimli” telekanali tasvirchisi ichki ishlar organi xodimlari tomonidan kaltaklangan. Bu haqda “Zamon.uz” nashri xabar berdi, biroq material hozirda o‘chirib tashlangan, shunga qaramay, Facebook’da uning nusxasi saqlanib qolgan. O‘shanda IIV matbuot kotibi Shohrux G‘iyosov sodir bo‘lgan voqeaga munosabat bildirib, holat bo‘yicha tekshiruv tayinlanganini ma’lum qilgandi.
Izoh (0)