Toshkent shahrida “Zo‘rTV” jurnalisti va operatori kalataklandi. Kaltaklangan operator ayni paytda shifoxonaga yotqizilgan.
Kaltaklangan jurnalist Nurzodbek Vohidovga ko‘ra, voqea bugun soat 13:30 atrofida sodir bo‘lgan.
Ijtimoiy tarmoqlarda Toshkent shahrida betonli to‘sin temiryo‘l ustiga qulab tushgani aytilgan xabarlar tarqalgach, aslida nima bo‘lganini bilish uchun voqea joyiga bordik. Voqea joyiga borganimizda jurnalistlar voqeani o‘rganib qaytishgan ekan. Bizga rahbariyat prokuraturaga ketishgan deyishgach, mayli, holatni syomka qilaylik, dedik. Va qulagan ko‘prikning oldiga bormay, syomka qildik. Rahbariyat kelavermagach, ularni so‘radik. Tushlikda deyishdi. Tushlik vaqti tugagach ham kelaverishmagach, yana so‘radik.
Rahbariyati kechikayotgani uchun bizdan oldingi kelgan kanal xodimlariga qayerlarni syomka qilishga ruxsat berilgan, o‘sha joylarni olaylik, vaqtimiz ziq deb tushuntirdik. Xo‘p, deb bizdan oldin borgan kanallar syomka qilgan joyni ko‘rsatishdi. Kirib, holatni tasvirga olayotganimizda kamerada ko‘ringan odam syomka qilma deb, so‘kinib ketdi. Salom berib, o‘zimizni tanishtirdik. Ammo u kishi hatto o‘zini ham tanishtirmay so‘kinib, ishimizni yig‘ishtirishimizni talab qildi. Bizni olib chiqish kerakligini aytdi. Shundan so‘ng o‘zi kameraga tashlandi, — deydi voqea haqida gapirgan jurnalist.
Suhbatdosh jurnalistning aytishicha, jurnalistlarni kaltaklagan zo‘ravonning ismi Nodir bo‘lib, uning lavozimi haqida maʼlumot yo‘q.
Operatorimiz Sardorbek Yo‘ldoshevning burnini sindirishdi. Ayni paytda operatorimiz tez yordamda shifoxonaga olib ketilgan. Menda ham jarohatlar bor. Shifokorlar tibbiy ko‘rik zarur dedi. Ammo telekanal kamerasi, mikrofonini ishxonaga yetkazishim kerak edi. Shu sabab men barcha ish qurollarni olib ishxonaga qaytdim, — deydi u.
Taʼkidlanishicha, voqea joyida telekanal kamerasi singan.
Bizni kaltaklay boshlagan, operatorimizning ishiga xalal bergan kishiga kameramiz qimmatligini tushuntirishga urindik. Ammo parvo qilmadi. Yonidagi kishilar bizga yordam berib, zo‘ravonni to‘xtatish o‘rniga, bizni ushlab olib, unga yordam berayotgandek edi, — deydi jurnalist.
“Zo‘rTV” jurnalisti Nurzodbek Vohidovning qo‘shimcha qilishicha, voqeadan so‘ng hudud profilaktika inspektori ularga qo‘ng‘iroq qilib, voqea haqida so‘ragan.
Shuningdek, telekanalimiz rahbariyati voqea yuzasidan huquqni muhofaza qiluvchi organlarga xat chiqarishmoqchi. Kanalimiz yuristi biz bilan suhbatlashib, hujjatlar tayyorlamoqda, — deydi Nurzodbek.
Izoh (0)