Тошкент шаҳрида “Zo‘rTV” журналисти ва оператори калтаклангани, оператор айни пайтда шифохонага ётқизилгани ҳақида хабар берилганди. Ички ишлар вазирлигининг маълум қилишича, ҳолат юзасидан жиноят иши қўзғатилган.
“Zo‘rTV телерадиокомпанияси ходимларига тан жароҳати етказилганлиги ҳолати юзасидан ИИВ Транспорт ва туризм объектларида хавфсизликни таъминлаш департаменти томонидан Жиноят кодексининг 277-моддаси (безорилик) 1-қисми билан жиноят иши қўзғатилиб, тергов ҳаракатлари олиб борилмоқда”, — дейилади хабарда.
“Ўзбекистон темир йўллари” АЖ раҳбарияти ОАВ вакилларига зўравонлик кўрсатиб, уларга қарши куч ишлатган ходим — “Кўприкқурилиш” трести унитар корхонаси 67-кўприкқурилиш отряди иш бошқарувчиси Н.Эшниязовнинг ишини кескин қоралаганди.
Мазкур ҳолат юзасидан зудлик билан ишчи гуруҳ тузилиб, шу куннинг ўзида Н.Эшниязов Меҳнат кодексининг тегишли бандларига асосан ишдан бўшатилди. Ўз навбатида АОКА мазкур ҳолат юзасидан Бош прокуратура ва Ички ишлар вазирлигига мурожаат йўллади.
“Дарё” билан суҳбатда бўлган канал журналисти воқеа пайтида телеканал камераси ва операторнинг бурни синганини маълум қилганди.
“Операторимиз Сардорбек Йўлдошевнинг бурнини синдиришди. Айни пайтда операторимиз тез ёрдамда шифохонага олиб кетилган. Менда ҳам жароҳатлар бор. Шифокорлар тиббий кўрик зарур деди. Аммо телеканал камераси, микрофонини ишхонага етказишим керак эди. Шу сабаб мен барча иш қуролларини олиб ишхонага қайтдим”, — деганди у.
Zo‘rTV журналисти Нурзодбек Воҳидовнинг қўшимча қилишича, воқеадан сўнг ҳудуд профилактика инспектори уларга қўнғироқ қилиб, воқеа ҳақида сўраган.
Эслатиб ўтамиз, 2022 йил 11 июнь куни Тошкентдаги “Пахтакор” стадионида U-23 Осиё кубогининг чорак финали доирасида Ўзбекистон термаси Ироқ миллий жамоасига қарши ўйин ўтказганди. Ўйинини ёритишга борган “Севимли” телеканали тасвирчиси ички ишлар органи ходимлари томонидан калтакланган. Бу ҳақда “Zamon.uz” нашри хабар берди, бироқ материал ҳозирда ўчириб ташланган, шунга қарамай, Facebook’да унинг нусхаси сақланиб қолган. Ўшанда ИИВ матбуот котиби Шоҳрух Ғиёсов содир бўлган воқеага муносабат билдириб, ҳолат бўйича текширув тайинланганини маълум қилганди.
Изоҳ (0)