So‘nggi kun — 13-avgust kuni o‘tkazilgan OTMning bakalavriat taʼlim yo‘nalishlariga kirish test sinovi natijalari eʼlon qilindi. Huquqshunos va bloger Xushnudbek Xudoyberdiyev mazkur natija orqali o‘qishga kirgan yoki kirmaganini bilish mumkinligini maʼlum qildi.
Uning so‘zlariga ko‘ra, 1-avgustdan 13-avgustga qadar bo‘lib o‘tgan barcha test sinovlarining natijalari maʼlum bo‘ldi. Endi mandat saytidagi ro‘yxat boshqa o‘zgarmaydi. O‘qishga kirgan yoki kira olmaganini ushbu natijalar orqali bilib olish mumkin bo‘ladi.
“Chunki hozir abituriyentlar beshtagacha tanlagan yo‘nalishlari bo‘yicha barcha ro‘yxatda turishibdi (yaʼni 1 kishi 5 ta ro‘yxatda turibdi), mandatda esa faqat 1 ta ro‘yxatda qoladi va to‘rttasidan o‘chiriladi. Bu degani hozirgi ro‘yxatdan kimdir chiqib ketsa ketadiki, lekin boshqa yo‘nalishdan baland ball olgan begonalar ro‘yxatga kelib qo‘shilmaydi”, — deydi huquqshunos.
Bundan tashqari, harbiy tavsiyanoma olganlar, nogironligi borlar, tavsiyanomali xotin-qizlar, harbiylarning farzandlari va boshqa imtiyozga egalar qo‘shimcha kvota bo‘yicha umumiy ro‘yxatdan chiqib ketadi.
“Mandat chiqqanda hozirgi ro‘yxatdagi o‘rningizdan teparoqqa ko‘tarilish ehtimolingiz juda yuqori, lekin pastga tushmasligingiz aniq. Demak, hozir ro‘yxat bo‘yicha ajratilgan kvota ichida turganlar albatta talaba bo‘ladi. Shuningdek, hozir kontraktni boshida turganlar budjetga ko‘tarilishi ham mumkin.
Kira olmaganlarchi? Ular umid qilsa bo‘ladimi?
Ha, bo‘ladi. Lekin ular hozirdan aniq bila olmaydi. Ular, yaxshisi, sabr bilan, duo qilib kutishsin”, — deydi bloger.
Izoh (0)