Qashqadaryoda yangi qurib bitkazilgan choyxona yonib ketdi

Qashqadaryo viloyati FVB Ko‘kdala tumanidagi choyxonada sodir bo‘lgan yong‘in to‘g‘risida ma’lumot berdi.

Qayd etilishicha, 13-avgust kuni soat 21:22 larda Ko‘kdala tumani FVB dispetcherlik xizmatiga tuman hududidagi “Xo‘jaobod” MFY hududida joylashgan yangi qurib bitkazilgan choyxonada yong‘in sodir bo‘layotgani to‘g‘risida xabar kelib tushgan.

Xabarga ko‘ra, yong‘inga 2 ta yong‘in-qutqaruv ekipaji jalb qilinib, soat taxminan 21:25 larda voqea joyiga yetib borgan (oraliq masofa 1 kilometr) va soat taxminan 22:30 larda to‘liq o‘chirilgan. 

Yong‘in oqibatida tadbirkor S.T.ga qarashli choyxonaning 260 metr kvadrat maydonda ichki va tom qismi yonib zararlangan.

“Yong‘in natijasida tan jarohati olganlar va halok bo‘lganlar yo‘q, hozirda surishtiruv ishlari olib borilmoqda”, — deyiladi xabarda.

Bundan oldin Buxoro shahar Ibn Sino ko‘chasida joylashgan ikki qavatli savdo do‘konlarida yong‘in sodir bo‘lgani, Farg‘onada karaoke kafesida yuz bergan yong‘in oqibatida 6 kishi halok bo‘lgani to‘g‘risida xabar berilgandi. 5-avgust kuni esa Namangan viloyati Favqulodda vaziyatlar boshqarmasi Chortoq tumanidagi bozorda sodir bo‘lgan yong‘in to‘g‘risida ma’lumot berdi.