Toshkentdagi ko‘p qavatli uyda yong‘in chiqdi: qutqaruvchilar 20 kishini evakuatsiya qildi (video)

Toshkent shahri Mirzo Ulug‘bek tumanidagi ko‘p qavatli uylardan birida yong‘in chiqdi, deb xabar beradi FVV matbuot xizmati.

Ma’lum qilinishicha, 6-avgust kuni soat 18:59 da Mirzo Ulug‘bek tumani “Beshkapa” MFY Buyuk Ipak Yo‘li ko‘chasida joylashgan ko‘p qavatli uy xonadonlarining birida yong‘in sodir bo‘layotgani to‘g‘risida favqulodda vaziyatlar bo‘limiga xabar tushgan.

Shunga ko‘ra, yong‘inga soat 19:06 da yetib borilib, soat 19:25 da o‘chirilgan. Yong‘inni bartaraf etishga 3 ta yong‘in-qutqaruv ekipaji, 1 ta avtonarvon va 1 ta yong‘in-qutqaruv otryadi bo‘linmasi jalb etilgan.

Yong‘in natijasida 15 kvadrat metr maydonda uy-jihozlari yonib zararlangan. Yong‘in o‘chirish jarayonida ushbu uy qavatlaridan 20 nafar fuqaro qutqaruvchilar tomonidan xavfsiz joyga evakuatsiya qilingan.

“Hodisa oqibatida tan jarohati olgan va halok bo‘lganlar yo‘q”, — deyiladi xabarda.

Bundan oldin Buxoro shahar Ibn Sino ko‘chasida joylashgan ikki qavatli savdo do‘konlarida yong‘in sodir bo‘lgani, Farg‘onada karaoke kafesida yuz bergan yong‘in oqibatida 6 kishi halok bo‘lgani to‘g‘risida xabar berilgandi. 5-avgust kuni esa Namangan viloyati Favqulodda vaziyatlar boshqarmasi Chortoq tumanidagi bozorda sodir bo‘lgan yong‘in to‘g‘risida ma’lumot berdi.