Toshkentning Shayxontohur va Uchtepa tumanlarining ayrim hududlari 14-avgust kuni tabiiy gaz ta’minotidan vaqtincha uzilishi to‘g‘risida xabar berilgandi. Veolia Energy Tashkent kompaniyasining ma’lum qilishicha, shu munosabat bilan Shayxontohur, Olmazor va Chilonzor tumanlarining ayrim joylarida issiq suv bo‘lmaydi.
Qayd etilishicha, asosiy issiqlik energiyasini yetkazib beruvchi (“Toshkent issiqlik markazi” MChJ) 3-IM issiqlik markazi ta’minotidan vaqtincha uziladi. O‘chirilish “Hududgaz Poytaxt” yuqori bosimli gaz quvurida rejalashtirilgan ta’mirlash ishlari bilan bog‘liq bo‘lib, 14-avgust kuni soat 08:00 dan 20:00 gacha amalga oshiriladi.
Issiq suvni o‘chirish quyidagi hududlar va joylarga ta’sir qiladi:
- Shayxontohur tumani: Chorsu, Qoratosh, Beshyog‘och, Xuvaydo, Anhor sohili massivlari, Zarqaynar ko‘chasi, S-10, 11, 13, 14, 26, 27 va 28;
- Olmazor tumani: B1, B2, B-3, Niyozov, Beruniy maydoni, Talabalar shaharchasi, Hamidxonov, Qoraqamish 2/1;
- Chilonzor tumani: Olmazor, Turob to‘la va Abay massivlari.
“Gaz ta’minoti qayta tiklangandan va 3-IM qozonxonasi ishga tushirilgandan so‘ng issiq suv ta’minoti tiklanadi”, — deyiladi xabarda.
Iyul oxirlarida Yashnobod, Olmazor, Mirobod, Yakkasaroy, Shayxontohur, Chilonzor va Sergeli tumanlarining ba’zi hududlarida yuklama sabab elektr energiyasi ta’minotiga vaqtincha cheklovlar kiritilgan edi. Avgust boshlarida esa Toshkentning qator tumanlarida elektr, issiq suv va gaz ta’minotlari vaqtincha to‘xtatilgan.
Izoh (0)