Buxoro shahar Ibn Sino ko‘chasida joylashgan ikki qavatli savdo do‘konlarida yong‘in sodir bo‘ldi. Bu haqda viloyat FVB matbuot xizmati xabar berdi.
1-avgust kuni soat 02:05 da viloyat FVB navbatchi dispetcherlik xizmatiga viloyat Milliy gvardiya xodimi qo‘ng‘iroq qilib, yo‘l yoqasida joylashgan ikki qavatli savdo do‘konlari (xalq tilida eski PMK savdo majmuasi)da yong‘in sodir bo‘layotgani to‘g‘risida xabar bergan.
Voqea joyiga viloyat garnizonidan 11 ta yong‘in-qutqaruv ekipaji hamda 7 ta hamkorlikdagi xizmatlar texnikalari jalb etildi. Yong‘in joyiga soat 02:07 da yetib borib, savdo do‘konlarining taxminan 700 kvadrat metr maydonga tarqalib yonayotgani to‘g‘risida maʼlumot olingan va soat 03:11 da batamom o‘chirilgan.
Yong‘in oqibatida Ibn Sino ko‘chasi yo‘li yoqasida joylashgan tadbirkorlik subyektlariga tegishli ikki qavatli 15 ta do‘konning ichki tovar mahsulotlari va shift qismi yongan bo‘lib, xuddi shu manzilda bo‘lgan Buxoro markaziy dehqon bozoriga qarashli bir qavatli savdo pavilyonidagi 8 ta savdo do‘koni (jami 23 ta do‘kon) ichida bo‘lgan tovar moddiy boyliklari va do‘kon jihozlari yonib zarar ko‘rgan. Yong‘indan bozor tasarrufidagi pavilyon va savdo do‘konlarining 10 ming kvadrat metr maydoni saqlab qolingan.
Yong‘in natijasida insonlarning halok bo‘lish va tan jarohati olish holatlari qayd etilmagan.
Sodir bo‘lgan yong‘in yuzasidan viloyat IIB va FVB tomonidan tergovga qadar tekshiruv ishlari olib borilmoqda. Yong‘inning kelib chiqish sababini aniqlash maqsadida yong‘in-texnik ekspertizasi tayinlangan.
Voqea joyiga viloyat sektor rahbarlari, FVB boshqarmasi boshlig‘i va boshqa masʼul rahbarlar jalb etilgan.
Izoh (0)