Namangan viloyati Favqulodda vaziyatlar boshqarmasi Chortoq tumanidagi bozorda sodir bo‘lgan yong‘in to‘g‘risida ma’lumot berdi.
Ma’lum qilinishicha, 5-avgust kuni soat 03:39 da Chortoq tuman favqulodda vaziyatlar bo‘limiga tumanning “Namangan” MFY Mustaqillik shohko‘chasida joylashgan Chortoq Tourist Trade Center MCHJ hududidagi ochiq rastalarda yong‘in sodir bo‘layotgani haqida xabar kelib tushgan.
Xabarga asosan soat 03:44 da yong‘in-qutqaruv ekipaji hodisa joyiga yetib borib, yong‘in soat 04:05 da o‘rab olingan va soat 04:20 da o‘chirilgan.
Yong‘in oqibatida 34 ta ochiq rasta hamda 5 ta yopiq do‘konning 250 kvadrat metr joyi, do‘kon ichki qismida bo‘lgan oziq-ovqat mahsulotlari yonib zararlangan. Qutqaruvchilar tomonidan 4 000 kvadrat metr joy saqlab qolingan.
“Hodisa oqibatida tan jarohati olgan va halok bo‘lganlar yo‘q. Hozirda sodir bo‘lgan yong‘in yuzasidan tergovga qadar surishtiruv ishlari olib borilmoqda”, — deyiladi xabarda.
1-avgust kuni Buxoro shahar Ibn Sino ko‘chasida joylashgan ikki qavatli savdo do‘konlarida yong‘in sodir bo‘lgandi. Yong‘in oqibatida tadbirkorlik subyektlariga tegishli ikki qavatli 15 ta do‘konning ichki tovar mahsulotlari va shift qismi zararlangan.
Izoh (0)