Afrika mamlakatlari “aqlli boshlarning ko‘chishi” tufayli tibbiyot xodimlari yetishmasligidan aziyat chekmoqda. Nigeriya, Gana va Zimbabvedan ko‘plab malakali shifokorlar AQSH, Avstraliya va Yevropaga ishlash uchun jo‘nab ketgan, deb yozadi The Guardian.
Jahon sog‘liqni saqlash tashkilotining talablari va vatanida ishlashga majburlovchi qonunlarga qaramay, shifokorlar va hamshiralar ommaviy ravishda Afrika davlatlarini tark etmoqda. Nigeriya, Gana va Zimbabveda shifokorlar yetishmayapti.
Nigeriya poytaxti Lagosda bemorlar hamshira qabuliga kirish uchun uch soatlab navbat kutishga majbur bo‘lmoqda. Nigeriyada 5 000 kishiga bitta tibbiyot xodimi to‘g‘ri kelyapti — taqqoslash uchun, rivojlangan mamlakatlarda har bir shifokorga 254 bemor to‘g‘ri keladi.
Tibbiy ma’lumotga ega bo‘lgan nigeriyaliklar vatanida ishlashni emas, balki chet elga — AQSH, Kanada, Buyuk Britaniya yoki Avstraliyaga, shuningdek, Yaqin Sharqqa borishni afzal ko‘radi. Hamshiralar bilan ham shunday holat: 2017-yildan beri 75 ming hamshira mamlakatni tark etgan.
Afrikalik ijtimoiy faollarning fikriga ko‘ra, shifokorlarning “qochib ketishi” sabablari tushunarli: ular yaxshi mehnat sharoitlari, ijtimoiy kafolatlar va munosib ish haqini xohlaydi. Jahon sog‘liqni saqlash tashkiloti ogohlantirishicha, “aqlli boshlarning ko‘chishi” oqibatida butun dunyo bo‘ylab, ayniqsa, o‘rtacha ish haqi past bo‘lgan mamlakatlarda shifokorlar yetishmasligi 2030-yilga borib 10 million kishini tashkil etadi.
“Shifokorlar va hamshiralar G‘arb va Yaqin Sharqda yaxshiroq hayot qidirib ketmoqda. Ularni to‘xtatish uchun qonun qabul qilishimiz kerakmi yoki ish sharoitlarini yaxshilashimiz kerakmi?”, — deb ritorik savol berdi nigeriyalik huquq himoyachisi va sobiq senator Shexu Sani.
Rasmiy ravishda JSSTning “qizil ro‘yxati” mavjud bo‘lib, unga 37 ta Afrika davlati kiradi: iqtisodiy rivojlangan davlatlar ushbu mamlakatlardan malakali shifokorlarni jalb qilmasligi kerak, deb aytiladi. Amalda bu taqiqlar ish bermayapti: masalan, o‘tgan yilning o‘zida 4 000 ga yaqin hamshira Ganani tark etgan. Shu bilan birga, Yevropada tibbiyot xodimlarini chet eldan, jumladan Afrikadan yollash keskin o‘sgan. JSSTning cheklovlarga rioya qilish haqidagi chaqiriqlari hozirgacha muvaffaqiyatsizlikka uchradi, emigratsiyani cheklovchi mahalliy qonunlar ham ish bergani yo‘q.
Izoh (0)