Hozirgi vaqtda ko‘plab mamlakatlar shifokorlarning hamda nogironlar uchun parvarish xodimlarining jiddiy yetishmovchiligiga duch kelmoqda. 2030-yilga borib dunyoda ushbu kasblar bo‘yicha 10 million mutaxassis yetishmasligi mumkin, dedi Jahon sog‘liqni saqlash tashkiloti (JSST) bosh direktori Tedros Adxanom Gebreyesus Jenevada bo‘lib o‘tgan brifingda.
“Tibbiyot xodimlari har qanday sog‘liqni saqlash tizimining asosidir”, — deb eslatdi u va ko‘plab mamlakatlar tibbiy xodimlarning keskin tanqisligini boshdan kechirayotgani, ularning ko‘pchiligi yaxshi maosh va sharoit izlab boshqa davlatlarga ketib qolayotganini aytdi. JSST hisob-kitoblariga ko‘ra, “agar hozirgi tendensiya davom etsa, dunyo 2030-yilga borib 10 million tibbiyot va parvarish xodimlarining yetishmasligiga duch keladi, eng qashshoq mamlakatlarda eng og‘ir tanqislik kuzatiladi”.
Gebreyesus ta’kidlaganidek, COVID-19 pandemiyasi “dunyoga sog‘liqni saqlash va parvarish xodimlarining qanchalik zarurligini eslatdi”. Pandemiyadan oldin ham bu mutaxassislarning aksariyati “xavfsiz bo‘lmagan sharoitlarda, kam maosh va tegishli tayyorgarlikdan o‘tmagan holda” ishlagan.
JSST hisob-kitoblariga ko‘ra, pandemiya davrida ushbu sektordagi ishchilarning yarmi “emotsional zo‘riqish”ni boshdan kechirgan. JSST rahbari, shuningdek, dunyoda tibbiyot xodimlarining qariyb 70 foizini ayollar tashkil etsa-da, ular sog‘liqni saqlash sohasidagi yuqori lavozimlarning chorak qismidan kamrog‘ida ishlashiga e’tibor qaratdi.
JSST barcha mamlakatlarni xavfsiz mehnat sharoitlari, munosib ish haqi bilan ta’minlash, mehnat huquqlarini himoya qilish, zo‘ravonlik va kamsitishlardan himoya qilish orqali “sog‘liqni saqlash va parvarishlash xodimlarini himoya qilish va ularga sarmoya kiritishga” chaqirdi.
Izoh (0)