Африка мамлакатлари “ақлли бошларнинг кўчиши” туфайли тиббиёт ходимлари етишмаслигидан азият чекмоқда. Нигерия, Гана ва Зимбабведан кўплаб малакали шифокорлар АҚШ, Австралия ва Европага ишлаш учун жўнаб кетган, деб ёзади Тhе Guardian.
Жаҳон соғлиқни сақлаш ташкилотининг талаблари ва ватанида ишлашга мажбурловчи қонунларга қарамай, шифокорлар ва ҳамширалар оммавий равишда Африка давлатларини тарк этмоқда. Нигерия, Гана ва Зимбабведа шифокорлар етишмаяпти.
Нигерия пойтахти Лагосда беморлар ҳамшира қабулига кириш учун уч соатлаб навбат кутишга мажбур бўлмоқда. Нигерияда 5 000 кишига битта тиббиёт ходими тўғри келяпти — таққослаш учун, ривожланган мамлакатларда ҳар бир шифокорга 254 бемор тўғри келади.
Тиббий маълумотга эга бўлган нигерияликлар ватанида ишлашни эмас, балки чет элга — АҚШ, Канада, Буюк Британия ёки Австралияга, шунингдек, Яқин Шарққа боришни афзал кўради. Ҳамширалар билан ҳам шундай ҳолат: 2017 йилдан бери 75 минг ҳамшира мамлакатни тарк этган.
Африкалик ижтимоий фаолларнинг фикрига кўра, шифокорларнинг “қочиб кетиши” сабаблари тушунарли: улар яхши меҳнат шароитлари, ижтимоий кафолатлар ва муносиб иш ҳақини хоҳлайди. Жаҳон соғлиқни сақлаш ташкилоти огоҳлантиришича, “ақлли бошларнинг кўчиши” оқибатида бутун дунё бўйлаб, айниқса, ўртача иш ҳақи паст бўлган мамлакатларда шифокорлар етишмаслиги 2030 йилга бориб 10 миллион кишини ташкил этади.
“Шифокорлар ва ҳамширалар Ғарб ва Яқин Шарқда яхшироқ ҳаёт қидириб кетмоқда. Уларни тўхтатиш учун қонун қабул қилишимиз керакми ёки иш шароитларини яхшилашимиз керакми?”, — деб риторик савол берди нигериялик ҳуқуқ ҳимоячиси ва собиқ сенатор Шеху Сани.
Расмий равишда ЖССТнинг “қизил рўйхати” мавжуд бўлиб, унга 37 та Африка давлати киради: иқтисодий ривожланган давлатлар ушбу мамлакатлардан малакали шифокорларни жалб қилмаслиги керак, деб айтилади. Амалда бу тақиқлар иш бермаяпти: масалан, ўтган йилнинг ўзида 4 000 га яқин ҳамшира Ганани тарк этган. Шу билан бирга, Европада тиббиёт ходимларини чет элдан, жумладан Африкадан ёллаш кескин ўсган. ЖССТнинг чекловларга риоя қилиш ҳақидаги чақириқлари ҳозиргача муваффақиятсизликка учради, эмиграцияни чекловчи маҳаллий қонунлар ҳам иш бергани йўқ.
Изоҳ (0)