9-avgust kuni Polsha poytaxti Varshavada Belarusdagi prezidentlik saylovlari va undan keyingi norozilik hamda repressiyalarning uch yilligiga bag‘ishlangan “Dzen salіdarnassі” aksiyasiga mingdan ortiq namoyishchi chiqdi. 2020-yilda o‘tkazilgan saylovlarni Yevropa Ittifoqi soxtalashtirilgan deb hisoblaydi.
Mitingda 2020-yilda ommalashgan shiorlar yangradi, ulardan biri: “Biz unutmaymiz, kechirmaymiz”, deb xabar bermoqda DW muxbiri. Ishtirokchilar Ukrainadagi urushga qarshi ekanini bildirgan va noqonuniy sudlanganlarni ozod qilishga chaqirgan. Huquq faollariga ko‘ra, hozirda Belarusda 1 500 ga yaqin odam siyosiy mahbus deb tan olingan.
Belaruslik muxolifatchi Pavel Latushko mitingda rejimga nisbatan sanksiyalar bosimini davom ettirish va Aleksandr Lukashenkoni hibsga olish uchun xalqaro order berilishini talab qilish zarurligini aytdi.
Gdanskdagi aksiya
Xuddi shunday aksiya Polshaning Gdansk shahrida ham bo‘lib o‘tdi. Ishtirokchilar shaharning tarixiy markazidan Yevropa birdamlik markazigacha piyoda yurib keldi. DW muxbirining so‘zlariga ko‘ra, aksiyada 500 ga yaqin odam to‘plangan. Mitingda belarus shoiri Andrey Xadanovich ishtirok etgan.
Shuningdek, aksiyalar Litva, Gruziya, Chexiya, Shveysariya, Buyuk Britaniya va AQSHda ham bo‘lib o‘tdi.
Tixanovskaya: “Biz hech qayerga ketmaymiz”
Belarus muxolifati yetakchisi Svetlana Tixanovskaya Vilnyusdagi mitingda nutq so‘zladi, deb xabar beradi Belarusning “Zerkalo” internet portali.
“Biz xalqimiz bilan faxrlansak bo‘ladi. Xalqimiz ozodlikka irodasini namoyon etdi”, — dedi u. “Uch yildan beri bu iroda yo‘qolmadi. Repressiyalarga qaramay. Ommaviy majburiy muhojirlikka qaramay. Men dushmanlarimizga aytmoqchiman: biz hech qayerga ketmaymiz”.
Prezidentlikka sobiq nomzod Tixanovskaya avvalroq DW nashriga bergan intervyusida shunday degandi:
“Ukraina g‘alaba qozonishi kerak va u g‘alaba qozonadi ham, keyin belarusliklar uchun yangi imkoniyatlar eshigi ochiladi”.
Izoh (0)