Pokiston prezidenti Orif Alvi bosh vazir Shahboz Sharifning taklifiga binoan 9-avgust kuni mamlakat parlamenti tarqatib yuborilganini e’lon qildi, deb xabar bermoqda Pokistonning Dawn nashri.
“Prezident Konstitutsiyaning 58-moddasi 1-qismiga asosan bosh vazir tavsiyasiga ko‘ra, Milliy Majlisni tarqatib yubordi”, — deyiladi Prezident devonining rasmiy akkauntida e’lon qilingan bayonotda.
Pokistonda navbatdagi parlament saylovlari 90 kun ichida bo‘lib o‘tishi kerak.
Bundan tashqari, amaldagi Vazirlar Mahkamasining vakolatlari tugatildi, uning o‘rnida muvaqqat hukumat tuziladi va bosh vazir nomzodi aniqlanadi. Yaqin uch kun ichida Shahboz Sharif Milliy Assambleyadagi muxolifat yetakchisi Raja Riaz bilan birgalikda respublika hukumatini vaqtincha kim boshqarishini hal qilishi kerak. Agar ular nomzod bo‘yicha bir qarorga kelmasa, bu vazifani parlamentning maxsus qo‘mitasi hal etadi. Uning tarkibiga teng miqdordagi hukmron va muxolifat vakillari kiradi.
Parlament a’zolari bilan xayrlashuv nutqida Sharif hokimiyatda bo‘lgan 16 oyni butun 38 yillik siyosiy faoliyatidagi eng qiyin sinov deb atadi.
OAV Shahboz Sharif o‘tgan yilning aprelidagi voqealarda faol ishtirok etib, hukumat rahbari bo‘lganini eslatdi. O‘shanda bosh vazir Imron Xonga ishonchsizlik votumi e’lon qilinib, u o‘z lavozimini tark etishga majbur bo‘lgandi. Keyinroq Xon mamlakat budjetiga zarar yetkazish ishi bo‘yicha qamoqqa tashlangan, ammo shu yilning may oyida garov evaziga ozod qilingan.
Tergov maʼlumotlariga ko‘ra, Xon va uning eng yaqin tarafdorlari Al-Qodir universitetini tashkil etish uchun qo‘shma jamg‘arma tashkil etgan, bu esa mamlakat budjetiga 170 million dollarga yaqin zarar yetkazgan.
5-avgust kuni Imron Xon “korrupsion harakatlar” uchun uch yillik qamoq jazosiga hukm qilindi va siyosiy faoliyatdan chetlashtirildi. Xonning advokati qaror ustidan shikoyat qilishini aytdi.
Izoh (0)