9 август куни Польша пойтахти Варшавада Беларусдаги президентлик сайловлари ва ундан кейинги норозилик ҳамда репрессияларнинг уч йиллигига бағишланган “Дзен салидарнасси” акциясига мингдан ортиқ намойишчи чиқди. 2020 йилда ўтказилган сайловларни Европа Иттифоқи сохталаштирилган деб ҳисоблайди.
Митингда 2020 йилда оммалашган шиорлар янгради, улардан бири: “Биз унутмаймиз, кечирмаймиз”, деб хабар бермоқда DW мухбири. Иштирокчилар Украинадаги урушга қарши эканини билдирган ва ноқонуний судланганларни озод қилишга чақирган. Ҳуқуқ фаолларига кўра, ҳозирда Беларусда 1 500 га яқин одам сиёсий маҳбус деб тан олинган.
Беларуслик мухолифатчи Павел Латушко митингда режимга нисбатан санкциялар босимини давом эттириш ва Александр Лукашенкони ҳибсга олиш учун халқаро ордер берилишини талаб қилиш зарурлигини айтди.
Гданскдаги акция
Худди шундай акция Польшанинг Гданск шаҳрида ҳам бўлиб ўтди. Иштирокчилар шаҳарнинг тарихий марказидан Европа бирдамлик марказигача пиёда юриб келди. DW мухбирининг сўзларига кўра, акцияда 500 га яқин одам тўпланган. Митингда беларусь шоири Андрей Хаданович иштирок этган.
Шунингдек, акциялар Литва, Грузия, Чехия, Швейцария, Буюк Британия ва АҚШда ҳам бўлиб ўтди.
Тихановская: “Биз ҳеч қаерга кетмаймиз”
Беларусь мухолифати етакчиси Светлана Тихановская Вильнюсдаги митингда нутқ сўзлади, деб хабар беради Беларуснинг “Зеркало” интернет портали.
“Биз халқимиз билан фахрлансак бўлади. Халқимиз озодликка иродасини намоён этди”, — деди у. “Уч йилдан бери бу ирода йўқолмади. Репрессияларга қарамай. Оммавий мажбурий муҳожирликка қарамай. Мен душманларимизга айтмоқчиман: биз ҳеч қаерга кетмаймиз”.
Президентликка собиқ номзод Тихановская аввалроқ DW нашрига берган интервьюсида шундай деганди:
“Украина ғалаба қозониши керак ва у ғалаба қозонади ҳам, кейин беларусликлар учун янги имкониятлар эшиги очилади”.
Изоҳ (0)