Belarusda bo‘lajak saylovlar “AQSHdagidek emas, balki adolatli” bo‘ladi. Bu haqda Belarus prezidenti Aleksandr Lukashenko Markaziy saylov komissiyasi raisi Igor Karpenko bilan uchrashuvda aytib o‘tdi, deb yozmoqda “BelTA”.
Belarus rahbari 2024-yilda bo‘lib o‘tadigan saylovga kuzatuvchilarni taklif etish masalasiga to‘xtaldi.
“Kuzatuvchilarni taklif qiladigan tashkilotlar qonun bilan belgilanadi, bizda yashiradigan hech narsa yo‘q. Kerakli vaqtda, zarur deb bilganimizda, kuzatuvchilarni taklif qilamiz. Saylovlar qanday o‘tishini ko‘rishlari uchun. Saylovni Amerikadagidek o‘tkazyapmiz, deb bizdan gina qilmasliklari uchun. (AQSHda) saylovdan keyin odamlarga qarata o‘q uzishadi, pochta orqali saylovlar o‘tkazib, ko‘p soxtalashtirishlar bo‘ladi. Buni ko‘rib turibmiz. Biz saylovlarni halol o‘tkazishimiz kerak”, — dedi Lukashenko.
Aleksandr Lukashenko yashiradigan hech narsa yo‘qligini ta’kidladi.
“Bugungi kunda 80 foizga yaqin (ovoz beruvchi) biz belgilagan yo‘nalishni so‘zsiz qo‘llab-quvvatlamoqda. Nega qo‘rqishimiz kerak? Xo‘sh, taraddud ko‘rayotgan va qarshi bo‘lgan 20 foiz uchun baribir kurashamiz. Buni prezident sifatida aytaman”, — dedi u.
“BelTA” xabariga ko‘ra, 2024-yilda Belarusda birinchi marta yagona ovoz berish kuni bo‘lib o‘tadi. Saylovlar nafaqat parlament tarkibini shakllantiradi, balki fuqarolar turli darajadagi mahalliy kengashlar deputatlarini ham saylaydi. Yangilangan Konstitutsiyada yagona ovoz berish kuni belgilangan. Bu fevral oyining oxirgi yakshanbasiga to‘g‘ri keladi. Shunday qilib, birinchi yagona ovoz berish kuni 2024-yil 25-fevralda bo‘lib o‘tadi.
Izoh (0)