O‘zbekistonda viloyat va tuman (shahar) darajasidagi hokimliklar vazifasi va funksiyalarining aniq chegarasi belgilanadi. Bu haqda jamoatchilik muhokamasi uchun e’lon qilingan “O‘zbekiston-2030” strategiyasi loyihasida ko‘zda tutilgan.
Unga ko‘ra, hokimliklar va vazirliklar bo‘linmalarining bir-birini takrorlovchi 70 dan ortiq funksiyalari optimallashtiriladi. Hokimliklarga yuklatilgan 500 dan ortiq vazifalar orasidan ular faoliyatiga xos bo‘lmaganlari bekor qilinadi.
Mahalliy ijro hokimiyati organlarini demokratik tamoyillar asosida shakllantirish, shu jumladan, hokimlarni saylash tizimini joriy etish va ularni muddatidan oldin lavozimidan ozod etishning huquqiy asoslari yaratiladi.
Hokimliklarning hududiy ijro organlari shtat birligi va tuzilmalarini belgilashdagi roli oshirilib, hududlarda amalga oshiriladigan vazifalar (funksiyalar) bo‘yicha “vakolatlar reyestri” shakllantiriladi.
Bundan tashqari, hokimlarning mahalliy kengashga rahbarlik qilish amaliyoti to‘liq bekor qilinib, kengash raisining huquqiy maqomi, asosiy vazifa va funksiyalari hamda javobgarlik doirasi aniq belgilanadi. Hududdagi aholi sonidan kelib chiqib har bir mahalliy kengashda 5 tagacha doimiy asosda faoliyat yurituvchi professional deputatlar korpusi shakllantiriladi. Mahalliy kengashlarning 300 dan ortiq funksiyalari qayta ko‘rib chiqib, o‘ziga xos bo‘lmagani bekor qilinadi.
Izoh (0)