Toshkent viloyati IIBB Tezkor qidiruv xizmati va uning quyi tizimi hamda sohaviy xizmat xodimlari tomonidan 2023-yilning 6 oyi davomida jinoyat sodir etgani va boshqa holatlar yuzasidan 344 nafar qidiruvda bo‘lgan shaxs ushlanib, qonun ustuvorligi va jazo muqarrarligi ta’minlandi, deb xabar bermoqda viloyat IIBB matbuot xizmati.
Xususan, qasddan odam o‘ldirish jinoyatini sodir etib, 2002-yildan buyon qidiruvda bo‘lgan 48 yoshli X.Sh. (Angren shahrida yashagan) Qozog‘iston huquq-tartibot organlari xodimlari bilan hamkorlikda ushlanib, O‘zbekistonga ekstraditsiya qilingan.
Shu kabi, qasddan odam o‘ldirish, bosqinchilik sodir etib, 2015-yildan buyon qidiruvda bo‘lgan 40 yoshli R.P. (O‘rta Chirchiq tumani IIB tomonidan qidiruvga berilgan) Rossiya huquq-tartibot organlari xodimlari bilan hamkorlikda ushlanib, O‘zbekistonga ekstraditsiya qilingan.
Firibgarlik sodir etib, 2021-yildan buyon qidiruvda bo‘lgan 29 yoshli S.N. (Oqqo‘rg‘on tumanida yashagan) ham Rossiya huquq-tartibot organlari xodimlari bilan hamkorlikda ushlanib, O‘zbekistonga ekstraditsiya qilingan.
Tahlillarga ko‘ra, qidiruvdagi shaxslarning asosiy qismi firibgarlik jinoyatini sodir etgan shaxslar hisoblanadi.
Bundan tashqari, o‘tgan 6 oyda turli sabablarga ko‘ra bedarak yo‘qolgan 23 nafar shaxs viloyat IIO xodimlari tomonidan aniqlanib, yashash manzillariga qaytarilishi ta’minlangan.
Izoh (0)