“Tolibon”ning Ezgulikni targ‘ib qilish va illatlarga qarshi kurashish vazirligi ayollar go‘zallik salonlari yopilayotgani sababini tushuntirdi. Bu haqda Hasht-e Subh Daily xabar berdi.
Vazirlikka ko‘ra, Afg‘onistonda go‘zallik salonlari uchun xarajatlar behudaligi, soch ko‘chirib o‘tkazish va qosh terish esa shariatga zidligi uchun yopilmoqda. Vazirlik vakili Muhammad Sodiq kelasi oy boshidan go‘zallik salonlari egalariga ishlashga ruxsat berilmasligini aytdi. U yomon iqtisodiy vaziyatda salonlarning narxi “osmon” ekanini bildirdi.
Mulozim shariatga ko‘ra, bir kishining sochini boshqa odamga zeb-ziynat uchun ko‘chirib o‘tkazish mumkin emasligini aytdi.
“Go‘zallik salonlarida ayollarga ortiqcha soch ko‘chirib o‘tkaziladi va ayollarning qoshlari olinadi, bu esa shariat qonunlariga mutlaqo ziddir”, — dedi u.
“Tolibon” Jamoatchilik bilan aloqalar vazirligi vakili ayollar salonlarida bo‘yangan ayolning tahorati buzilishini ta’kidladi.
Afg‘onistonda ayollar go‘zallik salonlarining yopilishi mamlakat fuqarolari va inson huquqlari tashkilotlarining keskin munosabatiga sabab bo‘ldi.
Birlashgan Millatlar Tashkilotining Afg‘onistondagi missiyasi bunday siyosat mamlakat iqtisodiyotiga zarar yetkazishi va “Tolibon”ning ayollar mehnatini qo‘llab-quvvatlash haqidagi da‘volariga zid ekanini aytdi.
Afg‘onistonda ayollarga nisbatan joriy qilingan taqiqlar
- Afg‘onistonlik ayollarning BMT idoralarida ishlashi,
- erkaklarga ayollar uchun kiyim tikish,
- ayollarning erkak shifokorlarga borishi,
- ayollarning shifoxonaga yolg‘iz borishi va
- ularning istirohat bog‘iga tashrif buyurishi,
- Afg‘onistonda oilalar va ayollarning bog‘lari yoki yashil hududlari bo‘lgan restoranlarga kirishi,
- ayollar ovozi eshitilgan reklamalarni efirga uzatish taqiqlangan.
Izoh (0)