Andijon viloyatida quvvati 400 MVt bo‘lgan quyosh fotoelektr stansiyasini qurish Xitoyning PowerChina International Group Limited kompaniyasi tomonidan amalga oshiriladi. Bu haqda “Dunyo” agentligi xabar berdi.
Energetika vazirligi maʼlumotiga ko‘ra, may oyida Xitoyga bo‘lib o‘tgan oliy darajadagi tashrif doirasida O‘zbekiston energetika vazirligi bilan PowerChina International Group Limited kompaniyasi o‘rtasida Andijon viloyatining Andijon tumanida quvvati 400 MVt bo‘lgan quyosh fotoelektr stansiyasini qurish bo‘yicha anglashuv memorandumi imzolangan.
Ushbu hujjatga asosan 31-iyul kuni Energetika vazirligi, Andijon viloyati hokimiyati va PowerChina International Group Limited kompaniyasi o‘rtasida loyihani amalga oshirishning asosiy shartlarini belgilovchi shartnoma imzolangan.
Mazkur shartnomaga muvofiq quyidagi ishlar amalga oshriladi:
- loyiha doirasida 2023-yilning sentabr oyida qurilish ishlari boshlanishi, quyosh fotoelektr stansiyasining dastlabki 100 MVt quvvati 2024-yil 1-aprelga qadar va to‘liq quvvati 2024-yil 30-noyabrga qadar ishga tushirilishi rejalashtirilgan;
- mazkur quyosh fotoelektr stansiyasi ishga tushgach, yiliga 700 million kilovatt soat elektr energiyasi ishlab chiqariladi, 212 million kub metr tabiiy gaz tejaladi va atmosferaga 294 ming tonna zararli issiqxona gazlari chiqishining oldi olinadi.
Taʼkidlanishicha, ushbu loyiha uchun qishloq xo‘jaligi mahsulotlarini yetishtirishda foydalanilmaydigan yer maydonlari tanlangan.
PowerChina International Group Limited kompaniyasi 2016-yilda xalqaro loyihalar uchun tashkil etilgan. U bugungi kunga qadar umumiy 200 GVt quvvatga ega loyihalarni amalga oshirgan. Kompaniya 2019-yilda 50,5 milliard dollar, 2020-yilda 58,2 milliard dollar va 2021-yilda 69,5 milliard dollar miqdorida aylanma mablag‘larga ega bo‘lgan.
Xitoyning “Sinxua” davlat axborot agentligi ma’lumotiga ko‘ra, Xitoyning Shensi provinsiyasi ma’muriy markazi Sian shahridan O‘zbekistonga fotoelektrik elementlar yuklangan poyezd yo‘lga chiqqan. Yuk poyezdiga O‘zbekistonda 1 GVt quvvatga ega fotoelektr loyihasi uchun mahsulotning birinchi partiyasi bo‘lgan 50 ta konteyner 20 MVt quvvatga ega fotovoltaik elementlar yuklangan.
Quyosh fotoelektr stansiyalarining qurilishi
O‘zbekistonda 2021-yilning may oyida Samarqand viloyatining Kattaqo‘rg‘on tumani va Jizzax viloyatining G‘allaorol tumanida har biri 220 MVt quvvatga ega ikkita yangi quyosh elektr stansiyasini davlat-xususiy sheriklik doirasida qurish bo‘yicha tender g‘olibi e’lon qilingandi. BAAning qayta tiklanadigan energiya sohasidagi Masdar kompaniyasi mamlakatda va Markaziy Osiyo mintaqasida elektr energiyasi ishlab chiqarishga eng past tariflarini taklif qilgan.
Samarqand va Jizzax viloyatlaridagi quyosh elektrostansiyalari yiliga 1,1 milliard kVt/soatgacha qayta tiklanadigan elektr energiyasi ishlab chiqarish imkoniyatiga ega bo‘ladi. Ularning ishlashi tufayli yiliga o‘rtacha 110 ming tonna yoki ularning butun xizmat davri davomida jami 3,4 million tonna karbonat angidrid emissiyasining oldi olinadi.
Ushbu loyiha “Quyosh energetikasini kengaytirish” dasturi ko‘magida amalga oshirilmoqda. Uning doirasida avvalroq IFC tender o‘tkazish bo‘yicha maslahat xizmatlarini ko‘rsatgan, Jahon banki esa stansiyalar tomonidan ishlab chiqarilgan elektr energiyasini sotib olish bo‘yicha jami 12 million AQSH dollarigacha bo‘lgan (har biri uchun 6 million AQSH dollaridan) majburiyatlarni bajarishi uchun bank kafolatlarini taqdim etadi.
Quyosh elektrostansiyalarini ishga tushirish uchun Masdar loyiha kompaniyalariga o‘z kapitalidan 193 million dollar investitsiya kiritadi. Masdar, shuningdek, Osiyo taraqqiyot banki, Yevropa tiklanish va taraqqiyot banki, Yevropa investitsiya banki hamda Osiyo infratuzilma investitsiyalari banki tomonidan 216 million dollar qarz mablag‘larini jalb qiladi.
Izoh (0)