Samarqand va Jizzax viloyatlarida 20-may kuni har birining quvvati 180—220 MVt bo‘lgan quyosh fotoelektr stansiyalarini (QFES) qurish loyihalari bo‘yicha tender g‘oliblari aniqlandi, deb xabar bermoqda Energetika vazirligi matbuot xizmati.
Abu Dhabi Future Energy Company PJSC (Masdar 220 MVt) kompaniyasi elektr energiyasining har bir kVt soatiga 1,791 sent (1,57 sent elektr energiyasi uchun va + 0,221 sent elektr tarmog‘i uskunalari uchun) taklifi bilan Samarqand viloyatining Kattaqo‘rg‘on tumanida QFES qurish bo‘yicha tender g‘olibi deb topildi.
Investitsiyalar va tashqi savdo vazirligi ma’lumotlariga ko‘ra, Jinko Power Technology Co. Ltd., China Power International Holding (CPIH) Ltd. va Jinko Power (HK) Co. Ltd. konsorsiumi ishlab chiqariladigan 1 kVt soat elektr energiya uchun 2,305 sentga teng bo‘lgan tarifi bilan ushbu tenderning zaxira g‘olibi deb e’lon qilindi.
Abu Dhabi Future Energy Company PJSC (Masdar) ishlab chiqariladigan 1 kVt soat elektr energiya uchun 1,823 sentga teng bo‘lgan tarifi bilan Jizzax viloyatida quyosh elektr stansiyasini qurish bo‘yicha xalqaro tenderda ham g‘olib bo‘ldi.
Jinko Power Technology, China Power International Holding va Jinko Power (HK) konsorsiumi ishlab chiqariladigan 1 kVt soat elektr energiya uchun 2,305 sentga teng bo‘lgan tarifi bilan ushbu tenderning zaxira g‘olibi deb e’lon qilindi.
Dastlabki malaka tanlovida Xitoy, Janubiy Koreya, Yaponiya, Saudiya Arabistoni, Birlashgan Arab Amirliklari, Hindiston, Janubiy Afrika, Rossiya, Ispaniya, Norvegiya va Fransiyadan 18 ta kompaniya ishtirok etgan, ulardan 15 tasi ushbu tanlovdan muvaffaqiyatli o‘tdi.
Ishtirokchi kompaniyalarning taqdim etilgan takliflarini baholash natijalariga ko‘ra, Jizzax viloyatidagi loyiha bo‘yicha 7 ta kompaniya ( Masdar, ACWA Power, Risen Energy, Jinko Power Technology, China Power International Holding va Jinko Power konsorsiumi, KEPCO, Samsung C&T Corporation va KIND konsorsiumi, PowerChina va Jiangsu Linyang Energy konsorsiumi, Total Eren S.A. va Total Solar INT konsorsiumi), Samarqand viloyatidagi loyiha bo‘yicha esa 6 kompaniyaga (Risen Energy’dan tashqari yuqoridagi barcha kompaniyalarga) elektr energiyasi tariflari to‘g‘risidagi moliyaviy takliflarning ochilishiga ruxsat berilgan.
Quyosh elektr stansiyalari 2022-yilning oxirigacha ishga tushirilishi kutilmoqda. Elektr stansiyalarining ishga tushirilishi yiliga 1,04 milliard kVt soat elektr energiyasini ishlab chiqarishni ta’minlaydi. Ushbu ikki loyihani amalga oshirish uchun jalb qilinadigan investitsiyalar miqdori 400 million dollarga baholanmoqda.
“Gazeta.uz” Masdar kompaniyasi bundan avval ham O‘zbekistonda bir necha loyihalarni amalga oshirish bo‘yicha g‘olib bo‘lganini eslatib o‘tgan. Xususan, kompaniya Navoiy viloyatida quvvati 100 MVt bo‘lgan quyosh fotoelektr stansiyasi, Zarafshonda quvvati 500 MVt bo‘lgan shamol elektr stansiyasi, Toshkent viloyatida quvvati 40 kVt bo‘lgan kichik elektr stansiyasi qurilishi va boshqa loyihalar bilan shug‘ullanadi.
20-may kuni bo‘lib o‘tgan tender savdolarida 84 ta xalqaro kompaniya ishtirok etish istagini bildirgan. Shulardan ikki bosqichli tanlovdan o‘tganidan so‘ng 15 ta malakali ishtirokchi takliflarni, shu jumladan, tijorat, texnik va moliyaviy takliflarini bildirgan. 16-mayga qadar takliflarni qabul qilish davomida Samarqand viloyatida 7 ta loyiha va Jizzax viloyatida 8 ta loyiha taklifi kelib tushgan.
Ushbu loyihalar O‘zbekistonda umumiy quvvati 1 GVt bo‘lgan quyosh fotoelektr stansiyalarini qurish dasturining bir qismi hisoblanib, u Energetika vazirligi, Investitsiyalar va tashqi savdo vazirligi va Moliya vazirligi tomonidan amalga oshirilmoqda. Dasturga Xalqaro moliya korporatsiyasi texnik yordam ko‘rsatadi.
Izoh (0)