Chex olimlari quyosh panellarining ishlash muddati tahlil qilingan maqola chop etishdi. Ularning fikricha, quyosh panellarining chidamliligi ortiqcha baholab yuborilgan.
Aniqlanishicha, va’da qilingan 20-25 yillik faoliyat o‘rniga, mamlakatdagi o‘nlab quyosh fermalari 11-yildayoq ishdan chiqqan. Quyosh energiyasiga investitsiya kiritayotganlar ushbu ma’lumotlarni hisobga olishlari kerak, aks holda ular quyosh energiyasi sohasidagi rentabellik bo‘yicha aldanib qolishadi, deb hisoblamoqda maqola mualliflari.
Manbaga ko‘ra, 2009—2010-yillarda Chexiyada qurilgan 85 ta quyosh elektr stansiyalarining monitoringi ma’lumotlari fotopanellar degradatsiyasining asosiy sababi ular zichligining buzilishi, yemirilish ekanligini ko‘rsatdi.
“Loyiha mualliflari boshidanoq sotib olingan quyosh panellarining 'texnik imkoniyatlari' haqida to‘g‘ri tushunchaga ega bo‘lmagan va bo‘rttirib va’da bergan. Bundan tashqari, qurilishda tejash evaziga ko‘proq foyda olish istagi vaziyatni yanada og‘irlashtirdi.
2009—2010-yillarda qurilgan elektr stansiyalarining xizmat qilish muddati hozirda o‘z nihoyasiga yetdi”, — deyiladi tadqiqotchilar maqolasida. 2009—2010-yillarda Chexiyadagi fotoelektr stansiyalarining kutilayotgan xizmat muddati 20-25 yil edi. Bugun, taxminan, 12 yildan so‘ng, bu taxmin juda optimistik ekanligi ma’lum bo‘ldi va haqiqiy xizmat muddati va’da berilgan muddatning yarmiga tengligi oydinlashdi”.
Quyosh fermalaridagi fotopanellar holatini tahlil qilish jarayonida olimlar bir xil monitoring tizimi — Solarmon-2.0 dan foydalanganlar. Barcha obyektlar bo‘yicha olingan natijalar juda o‘xshash. Ular quyosh panelini ishlab chiqaruvchi kompaniya haqidagi ma’lumotlarni oshkor etmayaptilar, lekin panellar birinchi darajali kompaniyalardan xarid qilinganini aytishmoqda.
Barcha panellar 35 graduslik burchak ostida o‘rnatilgan va ularning ko‘pchiligi EVA TPT laminati bilan qoplangan.
Tadqiqot jarayonida kuchlanishni oshirish uchun panellar ketma-ket ulangani, bu esa ularning tezroq buzilishiga hissa qo‘shgani ham aniqlandi.
“11-yildan so‘ng, siloksan qoplamasi (yoki boshqa ta’mirlash vositasi) qayta yangilanmasa, panelning samaradorligi shunchalik pasayadiki, uni butunlay almashtirish kerak bo‘ladi”, — deyiladi maqolada.
Shunday bo‘lsa-da, dastlabki 10 yil ichida fotopanellarning ishlashi e’lon qilingan xususiyatlarga mos kelgan.
Tadqiqotchilar, shuningdek, monitoring ma’lumotlaridan olingan natijalarning iqtisodiy tahlilini o‘tkazdilar va dastlab rejalashtirilganidan ancha past marjada bo‘lsa-da, qurilmalar hali ham foydali ekanligini aniqladilar.
“Elektr energiyasining nisbatan yuqori narxlari sharoitida elektr stansiyalarining o‘zini oqlash muddati 10 yildan ancha kamayib bormoqda, bu hozirgi vaziyatda investitsiya xarajatlarini qoplash uchun yetarli bo‘lar edi”, — deyiladi bayonotda. “Biroq, panellar ishlash muddatining har qanday qisqarishi investitsiyalarning o‘zini qoplay olmasligiga sabab bo‘ladi”.
Izoh (0)