Korrupsiyaga qarshi kurashish agentligi Oliy ta’lim, fan va innovatsiyalar vazirligi tomonidan e’lon qilingan ma’lumotlar asosida 2023-yilning dastlabki olti oyi davomida respublikadagi 70 ta davlat OTMlarining daromadlari va xarajatlari to‘g‘risidagi ma’lumotlarni tahlil qildi.
Ma’lum bo‘lishicha, respublika kesimida eng ko‘p daromadlar O‘zbekiston milliy universiteti (245 milliard so‘m), Farg‘ona davlat universiteti (191 milliard so‘m), Qoraqalpoq davlat universiteti (188 milliard so‘m) va Termiz davlat universiteti tomonidan (169 milliard so‘m) shakllantirilgan.
Toshkent shahrida joylashgan eng ko‘p daromad ko‘rgan OTMlarning qisqa ro‘yxati quyidagicha:
- O‘zbekiston milliy universiteti — 245 milliard so‘m;
- O‘zbekiston davlat jahon tillari universiteti — 165 milliard so‘m;
- Toshkent davlat iqtisodiyot universiteti — 151 milliard so‘m;
- Toshkent davlat texnika universiteti — 145 milliard so‘m;
- Toshkent moliya instituti — 102 milliard so‘m.
Olti oyda daromad va xarajatlar orasidagi ijobiy tafovuti yuqori bo‘lgan OTMlar:
- Samarqand davlat chet tillar instituti — 33 milliard so‘m;
- Navoiy davlat pedagogika instituti — 27 milliard so‘m;
- Termiz davlat pedagogika instituti — 24 milliard so‘m;
- Shahrisabz davlat pedagogika instituti — 19 milliard so‘m.
Bundan tashqari, 2023-yilning I yarim yilligi yakunlari bo‘yicha quyidagi OTMlar xarajatlari daromadlaridan yuqori bo‘lgan: Namangan davlat universiteti (-230 milliard so‘m), Chirchiq davlat pedagogika universiteti (-128 milliard so‘m), Urganch davlat universiteti (-85 milliard so‘m).
Oliy ta’lim, fan va innovatsiyalar vazirligining ma’lumotiga ko‘ra, bugungi kunda respublikada jami 210 ta OTM bo‘lib, ulardan 115 tasi davlat organlari tasarrufidagi OTMlar, 65 tasi nodavlat oliy ta’lim muassasalari, 30 tasi xorijiy OTMlar va ularning filiallari hisoblanadi.
OTMlarning daromadlari budjetdan moliyalashtirilgan mablag‘lar, to‘lov-kontrakt asosida o‘qitish uchun tushgan tushumlar, rivojlantirish mablag‘lari bo‘yicha daromadlar hisobidan shakllantiriladi.
Izoh (0)