Bugun, 4-avgust kuni Senatning navbatdagi yalpi majlisi ish boshladi. Majlis avvalida senatorlarning joylardagi muammoli masalalar to‘g‘risidagi fikrlari eshitildi.
Foto: “Daryo” / Madina Nurman
Senator Odiljon Eminovning aytishicha, Andijon viloyati Buloqboshi tuman tibbiyot birlashmasi o‘rganilganda, bino va undagi uskunalar manan eskirgani aniqlangan.
“U yerdagi jarrohlik, tez tibbiy yordam va reanimatsiya bo‘limlari taʼmirtalab holatda ekaniga guvoh bo‘ldik. Birlashmada 7 ta bo‘lim faoliyat yuritmoqda. Bino SSSR davrida, 1962-yili qurilgan. Birlashmada o‘sha davrda ham, hozir ham operatsiyalar qilib kelinadi. Biroq aksariyat uskunalar Sovet paytidan qolgan. Bino ayanchli holatda— deraza-romlari qor-yomg‘ir taʼsirida oynani ushlamaydigan darajaga kelgan. Vaholangki, ichkarida operatsiyalar o‘tkaziladi. Bino uchun mahalliy budjetdan 300 million so‘m pul ajratilgan. Lekin u pulga qilingan ishlar yengil-yelpi. Ularni balki qilgandan qilmagan maʼqul bo‘lardi. Chunki zax bosib, mog‘orlab ketgan devorlar ustini plastik bilan yopib qo‘yilgan. Plastik orqasida infeksiya va viruslar yashashiga sharoit yaratilgan”, — dedi senator.
O‘rganishlarga ko‘ra, viloyat hokimi tomonidan 2022-yilda 22 milliard so‘mlik umumiy tibbiyot kopmleksini yangilash, joriy va kapital taʼmirlash bo‘yicha “zayavka” berilgan.
“Lekin Sog‘liqni saqlash vazirligi va boshqa tashkilotlar bu masalani ko‘rib chiqmagan. Shuning uchun biz Sog‘liqni saqlash vazirligi, Iqtisodiyot vazirligi, Andijon viloyat hokimligi 2024-yilga mo‘ljallangan manzilli dasturga mana shu obyektni kiritishini so‘raymiz”, — dedi senator.
Mazkur masala yuzasidan munosabat bildirarkan, Sog‘liqni saqlash vaziri o‘rinbosari Otabek Fozilkarimov bino kelasi yilgi investitsiya dasturiga kiritilishini aytdi.
“Senatorimiz aytganlaridek, Buloqboshidagi tibbiyot birlashmasiga qarashli yuqumli kasalliklar va shoshilinch tibbiy yordam ko‘rsatish bo‘limlari haqiqatan ham ayanchli ahvolda ekani maʼlum bo‘ldi. Vaziyatni o‘rgangan senatorlarimiz takliflar berdi. Va shu asosda 2024-yilgi davlat investitsiya dasturida tez tibbiy yordam bo‘limini qaytadan qurish belgilanmoqda. Aytilganidek, binoda bir necha yillar davomida taʼmirlash ishlari qilingan. Lekin natija bo‘lmagan. Chunki binoning o‘zi juda ham eski. Shuning uchun qayta qurish bo‘yicha 13,5 milliard so‘mlik loyiha-smeta hujjatlari ishlab chiqilib, 2024-yilgi investitsiya dasturiga kiritilmoqda. Shuningdek, yuqumli kasalliklar bo‘limi uchun 8,5 milliard so‘mlik loyiha-smeta hujjatlari tayyorlanadi. Bu ham 2024-yilgi investitsiya dasturiga kiritiladi. Hozir loyihalar Iqtisodiyot va moliya vazirligi bilan ko‘rib chiqilmoqda”, — dedi u.
Senat raisi Tanzila Norboyeva bu masala doimiy nazorat qilinishini aytdi va 10 kun ichida parlament yuqori palatasiga aniq yechimlarni nazarda tutuvchi chora-tadbirlar kiritilishi kerakligini taʼkidladi.
Izoh (0)