O‘zbekistondagi yangi qurilgan ko‘p xonadonli uylardagi qariyb 400 ga yaqin liftda aniqlangan kamchiliklar bartaraf etilmasdan foydalanib kelinmoqda. Bu haqda Senat yalpi majlisida Mudofaa va xavfsizlik masalalari qo‘mita raisi Qutbiddin Burxonov maʼlum qildi.
Foto: “Daryo” / Madina Nurman
Senatorning aytishicha, 18-iyunda Toshkent shahar Yangihayot tumani “Yangi Darxon” mahallasidagi ko‘p qavatli uyning liftida yuzaga kelgan nosozlik sabab 11 nafar fuqaro jabrlangandi. Shundan so‘ng, Senat qo‘mitasi tomonidan mamlakatdagi liftlarning holati hamda ulardan foydalanishda qonunchilikka rioya qilinishining ahvoli o‘rganilgan. Natijada qator tizimli muammo hamda kamchiliklar mavjudligi aniqlangan.
.jpg)
“Vazirlar Mahkamasining tegishli qarori bilan Tog‘-kon, geologiya va sanoat xavfsizligini nazorat qilish inspeksiyasi zimmasiga ko‘p kvartirali uylardagi liftlarning texnik holati belgilangan talablarga muvofiqligini taʼminlash, ularning davlat ekspertizasidan o‘tkazilgan holda o‘rnatilishini nazorat qilish, nosoz liftlardan foydalanishni taqiqlash choralarini ko‘rish kabi qator vazifalar yuklatilgan. Biroq ajablanarli jihat shundaki, bu vazifalarni amalga oshirishi uchun inspeksiya zarur vakolatlarga va yetarli mutaxassislarga ega emas. Misol uchun, yangi qurilgan ko‘p xonadonli uy-joylarni davlat hayʼati qabul qilish komissiyasi tarkibiga inspeksiya kiritilmagan. Oqibatda mutaxassislarning tegishli xulosasi olinmasdan, yaʼni lift qurilmalari belgilangan tartibda davlat ro‘yxatiga olinmasdan hamda xavfsizlik tomonidan ko‘rikdan o‘tkazilmagan tarzda liftlar foydalanishga topshirilmoqda”, — dedi senator.
Qutbiddin Burxonovning maʼlum qilishicha, O‘zbekistonda yangi qurilgan ko‘p xonadonli uylardagi qariyb 400 ga yaqin lift uskunalarida aniqlangan kamchiliklar bartaraf etilmasdan foydalanib kelinmoqda.
“Hozirgi tartibga muvofiq, ko‘p xonadonli uylarda o‘rnatilgan liftlarning texnik holatini nazorat qilish, mavjud kamchiliklarni bartaraf etish bilan bog‘liq funksiyalar amalda ikkita davlat organi – ham Tog‘-kon, geologiya va sanoat xavfsizligini nazorat qilish inspeksiyasi, ham Ko‘p xonadonli uy-joy fondidan foydalanishni nazorat qilish inspeksiyasi tomonidan amalga oshirilishi belgilangan. Aslida bu ikki tuzilma ham o‘z vazifalarini to‘laqonli bajara olish imkoniyatiga ega emas.
Xususan, mamlakatdagi jami 4 mingdan ziyod ko‘p qavatli uylarda qariyb 11 mingdan ortiq lift mavjud. Tegishli meʼyoriy texnik hujjatlar talabiga muvofiq ular har oyda texnik ko‘rikdan va 12 oyda bir martda to‘liq texnik sinovdan o‘tkazilishi zarur. Holbuki, har ikkala inspeksiyaning ana shu birgina vazifani amalga oshirish uchun ham moddiy-texnik, tashkiliy va boshqa imkoniyati yo‘q. Oqibatda qonunchilikda, jumladan hukumat qarorlarida belgilangan muhim qoidalarning ijrosi taʼminlanmayapti”, — dedi qo‘mita raisi.
Vazirlar Mahkamasining 2020-yil 12-iyundagi qaroriga asosan, 2021—2023-yillar oralig‘ida jami 1685 ta lift uskunalari taʼmirlanishi va yangisiga almashtirilishi rejalashtirilgan. 2023-yilning 1-iyul holatiga ko‘ra, 1222 ta lift taʼmirlangan va yangisiga almashtirilgan.
“Mutasaddilar tomonidan olingan maʼlumotga ko‘ra, qolgan 463 tasini belgilangan muddatda taʼmirlash yoki almashtirish esa turli sabablarga ko‘ra (2020-yildagi narxlar bilan bugungi kundagi narxlar orasidagi farq sababli) shubha ostida qolmoqda”, — deya gapirdi senator.
Izoh (0)