Buyuk Britaniyaning Times Higher Education agentligi tomonidan tuziladigan Young University Rankings (“Yosh universitetlar reytingi – 2023”) reytingi dunyoning 50 yoshdan kichik bo‘lgan eng yaxshi universitetlari reyting natijalarini e‘lon qildi.
Qayd etilishicha, 2023-yilda O‘zbekistonning 12 ta oliy ta’lim muassasasi “reporter” maqomida qayd etilgan. Bu ko‘rsatkich o‘tgan yilga nisbatan 3 barobar ko‘p. O‘tgan yili mamlakatdagi 4 ta oliy ta’lim muassasasi reytingdan joy olgandi.
Mazkur OTMlar yangi turdagi maqom — “Reporter” universitetlar qatorida e’tirof etilgan. Bular:
- AKFA universiteti;
- Alisher Navoiy nomidagi Toshkent davlat o‘zbek tili va adabiyoti universiteti;
- Denov tadbirkorlik va pedagogika instituti;
- Namangan muhandislik-qurilish instituti;
- Navoiy davlat pedagogika instituti;
- Samarqand davlat chet tillari instituti;
- Toshkent davlat stomatologiya instituti;
- Toshkent davlat yuridik universiteti;
- Termiz davlat universiteti;
- Termiz muhandislik va texnologiyalar instituti;
- Toshkent shahridagi Turin politexnika universiteti;
- Urganch davlat universiteti.
The Young University Rankings — 2023 THE, WUR kabi xalqaro reytinglar bilan bir xil 13 ta samaradorlik ko‘rsatkichlaridan foydalanadi, biroq ular OTMlarda mavjud bo‘lgan eng keng qamrovli va muvozanatli taqqoslashni ta’minlash uchun barcha asosiy missiyalari – o‘qitish, tadqiqot, bilimlarni uzatish va xalqarolashtirish bo‘yicha baholanadi.
O‘zbekiston OTMlari xalqaro reytinglarda
2019-yilning oktabrida prezident Shavkat Mirziyoyev 2030-yilgacha oliy ta’lim tizimini rivojlantirish konsepsiyasini tasdiqlovchi qarorga imzo chekkan edi. Unga ko‘ra, O‘zbekiston Milliy universiteti va Samarqand davlat universitetini ilg‘or universitetlarga aylantirish va ulardagi ta’lim darajasini dunyoning 500 ta eng yaxshi universitetlari qatoriga qo‘shish rejalashtirilgan.
2020-yilda O‘zbekistonning to‘rtta universiteti Sharqiy Yevropa va Markaziy Osiyoning eng yaxshi oliygohlari qatoriga kirgan, 2021-yilning sentabrida esa O‘zbekistondagi 10 ta OTM dunyoning yetakchi universitetlari reytingiga kirish uchun nomzod sifatida tanlab olingan edi.
2023-yil mart oxirlarida O‘zbekiston milliy universiteti va “Toshkent irrigatsiya va qishloq xo‘jaligini mexanizatsiyalash muhandislari” Milliy tadqiqot universiteti 4 ta (zamonaviy tillar, matematika, fizika va astronomiya, atrof-muhit) fan bo‘yicha top-500 oliy taʼlim muassasalari qatoridan o‘rin egallagan.
Izoh (0)