O‘zbekistonda kredit-modul tizimi OTM tomonidan qo‘shimcha pul ishlab topish uchun joriy etilgani aytildi

Ijtimoiy tarmoqlarda kredit-modul tizimi oliy ta’lim muassasalari tomonidan qo‘shimcha mablag‘ ishlab topish uchun joriy etilgani haqida turli xabarlar tarqaldi. Oliy ta’lim, fan va innovatsiyalar vazirligi mazkur xabarlarga munosabat bildirdi. 

Unga ko‘ra, nizomga muvofiq akademik qarzdor (shu jumladan, o‘qishni ko‘chirishda fanlar farqiga ega bo‘lganda) talabalar ta’til vaqtida yoki keyingi semestrlar mobaynida tegishli fanlardan o‘zlashtirilmagan kreditlar miqdoriga mos ravishda bazaviy to‘lov-kontrakt miqdoridan kelib chiqqan holda to‘lovni amalga oshirgandan so‘ng o‘zlashtirilmagan fanlarni o‘z hisobidan qayta o‘qish huquqiga ega bo‘ladi. Talabani qayta o‘qitish (sinov yoki fanlar farqi uchun to‘lov emas) nazarda tutilmoqda. Ya’ni talabaga kredit to‘plash uchun qayta imkoniyat berilmoqda. Bunda professor-o‘qituvchi ushbu talabalarga belgilangan muddatlarda tegishli o‘quv mashg‘ulotlarini olib boradi. Albatta, mazkur jarayon muayyan xarajatlarni talab etadi. 

Ta’lim dasturlarini o‘lchash va taqqoslashning sinov birliklari tizimi Yevropa, Amerika hamda Osiyoning turli va aksariyat yetakchi universitetlarida bir necha o‘n yilliklar mobaynida qo‘llanmoqda. Kredit tizimi o‘quv dasturlarini shaffof va eng asosiysi, taqqoslanuvchan qiladi, bu esa talabalarning akademik mobilligini oshirishga imkoniyat yaratadi.

“Mamlakatimiz oliy ta’lim tizimini takomillashtirish ta’lim oluvchilar va o‘qituvchilarning o‘z faoliyatiga munosabatini o‘zgartirish zarurligini taqazo etadi. Bu holat kredit-modul ta’lim tizimi bo‘yicha ta’lim jarayonini tashkil qilishga to‘la mos keladi.

Kredit-modul tizimiga o‘tish O‘zbekiston Respublikasi ta’lim sohasining darajalari, bosqichlari, akademik darajalarini aniq baholashga imkon beradi va ularni shaffof, tashxislanadigan va tan olinadigan holatga keltiradi. Bu esa jahon ta’lim muhitiga qo‘shilishning bosh shartlaridan biri hisoblanadi.

Ushbu tizimning joriy qilinishi tayyorlanayotgan kadrlarimizni yuqori malakali va jahon miqyosida raqobatbardosh bo‘lishini ta’minlaydi”, — deyiladi munosabatda.