Коррупцияга қарши курашиш агентлиги Олий таълим, фан ва инновациялар вазирлиги томонидан эълон қилинган маълумотлар асосида 2023 йилнинг дастлабки олти ойи давомида республикадаги 70 та давлат ОТМларининг даромадлари ва харажатлари тўғрисидаги маълумотларни таҳлил қилди.
Маълум бўлишича, республика кесимида энг кўп даромадлар Ўзбекистон миллий университети (245 миллиард сўм), Фарғона давлат университети (191 миллиард сўм), Қорақалпоқ давлат университети (188 миллиард сўм) ва Термиз давлат университети томонидан (169 миллиард сўм) шакллантирилган.
Тошкент шаҳрида жойлашган энг кўп даромад кўрган ОТМларнинг қисқа рўйхати қуйидагича:
- Ўзбекистон миллий университети — 245 миллиард сўм;
- Ўзбекистон давлат жаҳон тиллари университети — 165 миллиард сўм;
- Тошкент давлат иқтисодиёт университети — 151 миллиард сўм;
- Тошкент давлат техника университети — 145 миллиард сўм;
- Тошкент молия институти — 102 миллиард сўм.
Олти ойда даромад ва харажатлар орасидаги ижобий тафовути юқори бўлган ОТМлар:
- Самарқанд давлат чет тиллар институти — 33 миллиард сўм;
- Навоий давлат педагогика институти — 27 миллиард сўм;
- Термиз давлат педагогика институти — 24 миллиард сўм;
- Шаҳрисабз давлат педагогика институти — 19 миллиард сўм.
Бундан ташқари, 2023 йилнинг I ярим йиллиги якунлари бўйича қуйидаги ОТМлар харажатлари даромадларидан юқори бўлган: Наманган давлат университети (-230 миллиард сўм), Чирчиқ давлат педагогика университети (-128 миллиард сўм), Урганч давлат университети (-85 миллиард сўм).
Олий таълим, фан ва инновациялар вазирлигининг маълумотига кўра, бугунги кунда республикада жами 210 та ОТМ бўлиб, улардан 115 таси давлат органлари тасарруфидаги ОТМлар, 65 таси нодавлат олий таълим муассасалари, 30 таси хорижий ОТМлар ва уларнинг филиаллари ҳисобланади.
ОТМларнинг даромадлари бюджетдан молиялаштирилган маблағлар, тўлов-контракт асосида ўқитиш учун тушган тушумлар, ривожлантириш маблағлари бўйича даромадлар ҳисобидан шакллантирилади.
Изоҳ (0)