O‘zbekiston prezidentining Afg‘oniston bo‘yicha maxsus vakili Ismatulla Irgashev boshchiligidagi delegatsiya Afg‘oniston bo‘yicha C5+1 maslahatlashuv formatida maxsus vakillar darajasidagi (Markaziy Osiyo+AQSH) maxsus sessiya yig‘ilishida ishtirok etdi. Bu haqda “Dunyo” agentligi xabar berdi.
TIV maʼlumotiga ko‘ra, tadbir davomida afg‘on inqirozini hal etish, mamlakatga tez fursatda gumanitar va boshqa yordam ko‘rsatish bo‘yicha xalqaro saʼy-harakatlar muhokama qilingan.
Tomonlar Afg‘onistondagi mavjud vaziyat, xalqaro hamjamiyatning mamlakat yangi hukumatiga nisbatan mujassamlashgan pozitsiyasini rivojlantirish, Afg‘onistonda barqaror va uzoq muddatli tinchlik o‘rnatish istiqbollari yuzasidan fikr almashgan.
Ishtirokchi davlatlar vakillari Afg‘onistonda inson huquqlariga rioya etilishi haqida so‘z yuritib, “Tolibon” tomonidan jahon hamjamiyatining talablarini bajarish bo‘yicha birgalikdagi saʼy-harakatlarni davom ettirish muhimligini taʼkidlagan.
“Xususan, forum ishtirokchilari afg‘onistonlik ayollar va qizlarning taʼlim olish hamda mehnat qilish huquqlarini taʼminlash muhimligini qayd etib, Afg‘oniston xalqiga insonparvarlik yordami ko‘rsatish zarurligini taʼkidladilar”, — deyiladi xabarda.
Markaziy Osiyo davlatlari va AQSHning maxsus vakillari mintaqadagi terrorchilik tahdidlariga qarshi birgalikda kurashish, shuningdek, Afg‘oniston hududini xalqaro terrorchilik tashkilotlari uchun xavfsiz boshpanaga aylantirishning oldini olish borasida yakdil fikr bildirgan.
Mart boshlarida Ostonada bo‘lib o‘tgan C5+1 platformasida O‘zbekiston tashqi ishlar vaziri bilan birga ishtirok etgandi. Mazkur yig‘ilishda Markaziy Osiyo iqtisodiy rivojlanishiga 25 million dollar ajratish to‘g‘risida qaror qabul qilingan. Bu mablag‘ iqtisodiy rivojlanishga qaratilgan.
Izoh (0)