Dunyodagi barcha elektrodvigatelli va gibrid avtomobillarning yarmidan ko‘pi Xitoyda ishlatiladi. Bu haqda ZSW Germaniya tadqiqot instituti ma’lumotlariga tayanib, dpa agentligi xabar berdi.
Institut ma’lumotlariga ko‘ra, 2023-yil boshiga kelib Xitoy yo‘llarida 14,6 million elektromobil harakatlanayotgan bo‘lsa, bu dunyodagi jami 27,7 million elektromobilning 53 foizini tashkil etadi.
Ikkinchi o‘rinda AQSH turibdi, mamlakatda 3,4 million elektromobil ro‘yxatga olingan. 1,9 million dona shunday mashinalarga ega Germaniya uchinchi o‘rinda. Fransiya va Buyuk Britaniya mos ravishda 1,1 million va 1 million elektromobil bilan to‘rtinchi va beshinchi o‘rinlarni egallagan.
ZSW ma’lumotlariga ko‘ra, Xitoy elektrotransport vositalari bozorida nafaqat hukmronlik qilyapti, balki boshqa mamlakatlardan tobora tezroq o‘zib ketyapti.
“Agar Germaniya 2030-yilga borib ko‘chalarga 15 million elektromobilni chiqarish bo‘yicha o‘z oldiga qo‘ygan maqsadiga erishmoqchi bo‘lsa, u holda har yili 2022-yildagidan ikki baravar ko‘p shunday avtomashinalarni ro‘yxatdan o‘tkazishi kerak”, — dedi institut matbuot kotibi Andreas Pyuttner.
Eslatib o‘tamiz, Tesla avtomobillarining to‘rtala modeli (Model 3, X, Y, S) 2023-yilning “eng amerikabop avtomobillari” deb topilgandi. Ular AQSHda eng ko‘p ishlab chiqarilib, amerikaliklar tomonidan eng ko‘p foydalanilmoqda.
Izoh (0)