Niderlandiya qirg‘oqlari yaqinida yuk kemasida sodir bo‘lgan yong‘in oqibatida bir kishi halok bo‘ldi, bir necha kishi jarohat oldi, deb xabar bermoqda NOS nashri Qirg‘oq qo‘riqlash xizmatiga tayanib.
Nashr maʼlumotlariga ko‘ra, Panamaga qarashli yuk kemasida 23 nafar ekipaj aʼzosi bor edi. Ularning barchasi evakuatsiya qilingan. Yaradorlarning aniq soni noma’lum. Kema Germaniyadan Misrga 2 857 ta transport vositasini olib ketayotgan bo‘lgan, ulardan 25 tasi elektromobil edi. Qirg‘oq xavfsizlik xizmati vakilining so‘zlariga ko‘ra, elektromobillardan birida olov chiqqan, bu esa kemadagi yirik yong‘inga sabab bo‘lgan. Olovni o‘chirish ishlari hali davom etmoqda.
NL Times nashrining yozishicha, yong‘in juda tez tarqalgan, xavf tufayli o‘t o‘chiruvchilar bortga chiqarilmagan, aksincha, yong‘inni dengizda qayiqlardan turib o‘chirish boshlangan. Kemaning cho‘kib ketishining oldini olish choralari ko‘rilmoqda, biroq Qirg‘oq xavfsizlik xizmati shunday ssenariyni istisno etmayapti. Kema suzayotgan paytda, kuchli shamol va oqim tezligiga qaramay, uni buksirga bog‘lashga muvaffaq bo‘lingan.
Avvalroq Filippinda bortida 120 nafar yo‘lovchi va ekipaj a’zolari bo‘lgan parom ochiq dengizda yonib ketgandi.
Izoh (0)